TURA: Meghalaya a·doko e·ching ge·e man·aniko bariatna gita a·dok sorkarini ra·gatgipa ‘Ginger Mission’-ni kamrangna a·dok sorkari, gong kror 121 tangkarangko bilsi gittamna chame donaha ine Sukrobar salo, a·dokni Chief Minister Conrad K Sangma, Rongram Block-ni ning·o donggipa Oragitok songo ia Mission-ko a·bachengate on·angani somoio, jinmana parakataha.
Meghalaya a·doko e·ching ge·aniko bariatna aro dingtang dingtang rokomni e·chingrangko ge·na miksonganio a·dok sorkari, ia ‘Ginger Mission’-ko a·bachengatahachim aro ia program-ko a·bachengatanichi a·doko game ge·e cha·giparangoni sak 40,000-mangni gita ia program-ni namgnirangko man·na siengachim.
Ia program-ko ong·atanio dol 40 producer group-rangna gong lak 27.60-ni cheque-rangkoba suale on·angjolaha aro Apiculture Mission 2.0-ni ning·o dingtangmancha bija jilani baksorangkoba Chief Minister-ni jakchi suale on·angjolaha.
Ia Ginger Mission-ko Oragitok songo a·bachengatna gita jinma tom·bimonganiko ong·atanio a·dokni Chief Minister, jinmana aganprakengon, ia bilsigittamna chamgipa gong kror 121 tangkarangchian ia program-ni processing unit-rangko kulina, game ge·e cha·giparangna skie on·na aro dingtang dingtang kamrangna jakkalanggen ine parakataha.
“Ia mission ba kamni mongsonggipa miksonganiara da·o mikkang bilsi gittamni gisepo bilsio metric ton 60 e·ching man·aniko bilsiprako metric ton 150-ona bariatna aro India a·songo Meghalaya a·dokko e·ching man·batsranggipa a·dok ong·atna miksonganian ong·enga,” ine Chief Minister aganaha.
Ia Ginger Mission-ko chu·sokgipa ong·atna man·na gita songni nokni manderangna aro game ge·e cha·giparangna ia mission-ni bidingo agan-talate on·china gitaba Chief Minister, sorkari official-rangko aro dingtang dingtang dolrangko didiangaha.
Ia tom·anio North Tura-ni MLA Thomas A Sangma, West Garo Hills a·jani Deputy Commissioner Ram Singh aro gipin official-rangba dongpae bak ra·angaha.
