SHILLONG: Hynniewtrep National Youth Front (HNYF), mni Sukrobar salo CUET-ni mamlako nipiltaichina University Grant Commission-na chitti seataha. CUET, India-ni songadam jolrango donggipa mongsongbate Meghalaya-o donggipa manderangna namen neng·nikaniko ra·bagen ine janapataha.
“UGC, ge·sa institution ong·e, a·songko education-ni bidingo dilchina aro ia CUET-ni mamlako nipiltaichina mol·molata, ine HNYF-ni president Sadon K Blah, UGC-ni Chairman M Jagadesh Kumar-na seatgipa chittio janapataha.
“UGC, poraigiparangoniko tangka kamaina cholko sandigipa ong·a. Class XII exam-na krorni kror poraigiparangoniko gong 400 tangkaoniko gong 800 bariate ra·enga, ian poraigiparangoniko ra·seke ra·ga gita ong·a ine Blah aganaha.
Classs XII-o nama percentage-o pass ka·giparang CUET-ko pass ka·ja ong·ode, uamang UG course-ko ra·na man·jawa iani giminba mamingkon talata dongja. Indake ong·ode poraigiparang higher education level-ko mikkangchi ra·na man·jawa? Bang·a chadamberangan simple degree certificate-ko ra·na nangnika, uandakgipa chadamberangko UGC-ara champengengama? ine Blah sing·ataha.
Minggipin CUET-ko computer base test (CBT) mode-osa ong·atgen, indake ong·ode Meghalaya a·dokni bang·bate percentage-an rural ong·a aro IT sector-rang komia. Internet connection namja iarangni gisepon maidake chamdaberang cholko man·gen ineba sing·ataha.
