4-gipa Meghalaya Games 2022-ko a·dokni CM do·ga oe on·anga

Mikangchi kal·susagiparangko nambate sokachakchina CM didianga

SHILLONG: Brigipa changna ong·atenggipa Meghalaya Games 2022-ko Mongolbar pringo, a·dokni Chief Minister Conrad K Sangma, Shillong songjinmani Polo-o donggipa Shillong Sports Association (SSA) First Division Ground-o do·ga oe on·angaha.
Ia Meghalaya Games-ko a·dokni bilsi 50 gapaniko maniani bak gita ong·atjolenga aro iano gimik ming 19 kal·susaanirangko ong·atengon, a·dok gimikoni sak 2600 kal·susagiparang bakko ra·enga.
Ia Meghalaya Games-ko Mongolbar salo a·bachengate da·o re·baenggipa May 7 tariko, NEHU-o donggipa SAI Centre-o matchotatskagen.
Ia Meghalaya Games-o mingsni kal·susaanirang, chong·motan Archery, Athletics, Men’s Football, Gymnastics, Weightlifting, Karate aro Table Tennis-ko NEHU-ni SAI Centre-o sokachakenga aro Basketball kal·susaaniko NEIGRIHMS-o sokachakskaenga. Boxing kal·susaaniko Mawlai Mawroh Indoor Hall-o sokachakenga aro me·chikrangni robol kal·susaani (Women’s Football)-ko Semi Final-onade Mawlai Madan Heh-o sokachake final-kode SAI-o ong·atangskagen.
Ia chang Meghalaya Games-o mingbonga kal·susaanirangko ra·dapaha aro ia kal·susaanirangara, Golf, Football, Gymnastics, Wightlifting aro Cycling ong·enga.
Golf kal·aniko Shillong Golf Course-o, Cycling-k Malki-o, Tennis, Billiards aro Snooker-ko Shillong Club-o, Judo aro Taekwondo-ko Laban SC Indoor Stadium-o, Wushu-ko Madanriting Indoor Hall-o, Shooting-ko Assam Regimental Centre-o aro Swimming-ko Crinoline Swimming Pool-o sokachakskaenga.
Ia brigipa Meghalaya Games-ko do·ga oe on·angani somoio a·dokni Chief Minister jinmana aganprakangengon, batanggimin sal somoirango sajinmarang giproroahaoba da·o Meghalaya Games-ko ong·atna man·engani gimin ua namen kusi ong·a ine parakangaha.
Sajinmani somoio ia Meghalaya Games-ko ong·atna man·aniara a·dok sorkarini kal·susaanirangko namdapatna gisik on·aniko aro mongsongbate a·dokni chadamberangna gisik on·aniko mesokani ong·enga ineba ua aganaha.
Kal·susagiparangko sokachakanio kamrang namjahani gimin an·tangni suk ong·gijaniko parakatengon, mikkangchi iandakgipa obostarang ong·taijana gita ianoniko skie ra·e mikkangchi nambate kamrangko ka·china gita a·dokni Chief Minister, Meghalaya State Olympic Association (MSOA)-ni membor-rangko didiangaha.
“Beben an·ching pilak kamrangode chu·soksranggipa ong·na man·ja aro chu·sokgijaniara an·chingni janggi tanganio bakan ong·a indiba an·ching an·chingni dakgualanirangko nienba skie ra·na nanga aro kamrangko namdapatna jotton ka·na nanga,” ine Sangma aganaha.
Kal·susagiparangko name sokachakjahani gimin a·dokni Sports Minister Banteidor Lyngdoh-ba an·tangni suk ong·gijaniko parakatengon, mikkangchi iandakgipa kamrangko sorkari nie dongjawa ine parakatenba, an·tangtangni chu·sokgijanirangko namdapatchina gita MSOA-ni membor-rangko didiangaha.
“Mikkangchi iandakgipa obostarang ong·taijana gita an·ching kamko ka·na,” ine Lyngdoh aganaha.
Meghalaya Games-o bak ra·na re·anggipa manderangko mikka selprugipa aro sel·tagijagipa biaprango sokachaksoahani gimin kal·susaanio bak ra·na re·anggipa manderang an·tangtangni suk ong·gijaniko social media-rango parakatani ja·man, a·dokni Chief Minister Conrad Sangma an·tangan ia biaprangona re·anga ja·mano kal·susagiparangko gipin biapona apjitatahachim ine nikna man·a.

Get real time updates directly on your device, subscribe now.

Comments are closed.