TURA: Bus garirangko Chasingre-o donggipa Inter State Bus Terminus (ISBT)-o donchina ge·etani ja·manoba mitam bus garirangkode PWD ramani sepangrango aro manderangni dongchakgipa biap sambarango donggipa parking lot-rango donengkuani a·sel Tura jillani ramarango apchangket ong·anirangko nikna man·engani gimin dingtang dingtang biaprangoni Tura-ona re·baenggipa pilak bus garirangkon ISBT-o donchina gita West Garo Hills a·jani Deputy Commissioner Ram Singh ge·etaniko on·angtaiaha.
Re·anggipa April-ni 11 tariko, Bus garirangko chalaienggipa manderang baksana West Garo Hills a·jani Superintendent of Police (SP), District Transport Office aro Meghalaya Transport Corporation Ltd-ni official-rang baksa tom·e chanchirimanio, Chasingre-o donggipa ISBT-ko chu·gimik chalaina tik ka·angani ja·man, Tura-ona re·baenggipa pilak bus garirangkon ISBT-o donchina gita West Garo Hills a·jani Deputy Commissioner ge·etaniko on·angaha.
“Tura jillao gari gorarangko name re·rurana on·na man·na gita aro mikkangchi maming a·sel ong·anirang dongjana gita Tura-ona re·baenggipa pilak bus garirangkon Chasingre-o donggipa ISBT-o donchina ge·etaniko on·enga. Ramarango naljokanina Supreme Court-ni ge·etaniba dongani gimin bus garirangko ISBT-o donchina u·iatenga,” ine Deputy Commissioner-ni on·atgipa ge·etanio parakataha.
Indake ong·engon, bus nokgiparangko aro gari saltimgiparangko an·tangtangni bus garirangko ISBT-o donna gita ge·etaniko on·china gitaba Deputy Commissioner, Tura-ni District Transport Officer aro West Garo Hills Bus Association-ni dilgiparangna u·iataniko on·angaha.
