SHILLONG: Meghalaya a·doko gipin dolrang baksa nangrime kamrangko ka·na skangba doltangkon bilakatchengna nanggen ine All India Trinamool Congress (AITC)-ni Meghalaya in-charge Manas Ranjan Bhunia parakataha.
Meghalaya a·doko BJP dolko warachakna gita Congress dol baksa bakrimani bidingo janapatengon, “Ian nambegipa jumang gita ong·a indiba Charles Pyngrope aro Opposition dolni dilgipa Mukul Sangma-ni dilanichi AITC-ko Meghalaya a·doko bilakatanian da·o dipet chingni mongsonggipa miksongani ong·enga,” ine Bhunia parakataha.
Sokgiparangko okamna skangba nokdangko rikchengna nanga ineba ua aganaha.
Goa aro uandakgipa gipin a·dokrangode BJP dolko warachakna gita AITC dol, Congress aro gipin dolrang baksa bakrimengachim ine nikna man·a.
Indake ong·engon, Meghalaya a·doko Assembly election-ko ong·atna da·o adita jarangsan dongaiahani gimin doltangko bilakbatatna aro manderangona sokatanian AITC dolni mongsonggipa miksongani ong·enga ine Bhunia parakataha.
“Chingni dilgiparang kakket ong·giparang aro manderangni ra·chakna man·gipa manderangan ong·a aro chinga re·mikkangange 2023 bilsini election-o ka·dongani gnang susana ka·dongenga. Chingni gisepo maiba chu·onggijanirang donggenchimode chinga uarangko sandie namatna jotton ka·gen,” ine Bhunia aganaha.
Khasi aro Jaintia Hills a·jarangnaba AITC apsan daken gisik on·e kamko ka·enga ine janapatengon, Meghalaya sorkari manderangni nangnikanirangko chu·sokatna man·jahani gimin ia jolni manderangba dingtanganiko sandienga ine AITC-ni dilgipa parakataha.
AITC dolko ‘Bengal Party’ ine dingtang dingtang dolrangni agananikoba Bhunia raken jegalataha aro ian India a·song gimikni dolan ong·a ine talataniko on·angaha.
