TURA: Garo Hills-ni dambonga a·jarangon rama jal·langrang namjae, songre songgabatenggipa manderang aro jolo songdongenggipa manderang neng·nikanirangko chagrongna nangtokenga.
Garo Hills-ni NH-51, NH-44 aro NH-62-ni mitam bakrangde adita namkalgenchimoba Garo Hills-ni gipin bakrangona songreanggenchimode rama jal·langrang namsrangjani a·selan songre songgabatenggipa manderang bang·a neng·nikanirangko chagrongna nangtokenga.
West Garo Hills a·jani a·kawe jolo donggipa Agia-Medhipara-Phulbari-Tura ramako gitcham sorkari tarie on·ahaoba ia rama batanggimin bilsi 20-onin apsan obostao ong·engako nikna man·enga aro uandaken ia ramao bang·en gari gorarangni napkete donganirangko nikna man·aha.
Ia kilometre 145 ong·gipa AMPT ramako tarie on·china gita jolo songdongenggipa manderang aro dingtang dingtang dolrang dabitokengoba da·onan apsan obostao ong·engako nikna man·engkua.
Ia ramako 2014 bilsio tarie on·ahaoba ia rama gita dal·dalgipa garirang re·ruraengani a·sel ta·raken nosto ong·piltaiahachim.
New Bhaitbari jolo songdongenggipa manderangni parakatani gitade, Garobadha-oni Rajabala-ona km 40-mang ong·e bakrogipa ramani bakrang namjabatsranggipa ong·enga aro ia ramako re·ruraenggipa manderang namen neng·nikanirangko chagrongna nangtokenga.
East Garo Hills a·jani Songsak-oni North Garo Hills a·jani Mendipathar-ona dakanggipa ramani giminba dingtang dingtang dolrang aro jolo songdongenggipa manderang matnange parakattokaha.
Koborko on·ani gitade, ia ramako German technology-chi tarina gita gitcham Congress sorkari, C&C company-na on·ahachim indiba ramako tarianio somoi ru·ute nangahani a·sel ia ramani obosta namjabatna a·bachengaha. Ia apsan company-nan Mendipathar aro Resubelpara ramakoba tarina on·ahachim indiba da·alonan ia ramako matchotchipkujaengachim.
Songsak-oni Mendi-ona dakanggipa ramani bang·bata bakrangan re·na namgenchimoba km 8 ba 10-mangni gitade obosta namsrangjaha aro da·o wachi sokbataiengahani gimin ia ramani obosta namjabatanggnok ine jolni manderang parakataha.
North Garo Hills a·jaoni South Garo Hills a·jaona dakanggipa NH-62 ramako niatskagenchimode ia rama skang chasongonin namjabatsranggipa ramarangoni dilsa ong·a ine nikna man·a. Da·ororo ia rama gita Jadigittim-onade rama namkalahaoba uni ja·mande ia ramani obostarang namangtaijahachim. Skangode ia NH-62 ramao dam 30-na baten bolni dolongrang dongachim indiba ia ramako batanggimin bilsirangonin tarina a·bachengatahani gimin mitam bolni dolongrangkode pe·gale gital dolongrangko tariskaaha.
Ia NH-62 ramao donggipa Rongsa Awe-oni Dimapara-onade obosta namsrangtaijaha ine jolo songdongenggiparang parakataha.
Indake ong·engon, Garo Hills-o taridapna nangenggipa ramarangoni Rongram-Dadenggre-Phulbari rama (Hill Road), Gonglanggre-Selsella-Rajabala-
