SHILLONG: Meghalaya a·doko joa kal·aniko aro online gaming-ko niamo ong·atna a·dok sorkarini ja·ku de·aniko a·dokni dingtang dingtang toromko dilgiparang jegalgrimtokaha.
Iani bidingo Shillong All Faiths Forum (SAFF)-ni gita jegalatengon, Meghalaya Regulation of Gaming Rules 2021 aro Meghalaya Regulation of Gaming Act 2021-ni subsection (1) Section 29-ara a·dokni dingtang dingtang biaprango joa kal·chakgipa biaprangko kulidapna bilko on·ani gita ong·gnok aro ian Meghalaya a·dokni songsalo namen kragijani ong·enga ine parakataha.
Meghalaya a·doko joa kal·aniko niamo ong·atgenchimode ian songsalko nosto ka·anisan ong·aigija manderangni janggi tanganio nosto ka·aniko ra·baani gita ong·gen ineba SAFF-ni dilgiparang parakataha.
Meghalaya a·doko namroro silroroaniko ra·bana gita kajinarangko nanggenchimoba iandake joa kal·aniko niamo ong·ataniara namen ra·chakna man·gijani ong·enga ineba SAFF-ni dilgiparang, kajinako man·na gita dingtang cholrangko sandiskachina gita a·dok sorkariko didiangaha.
Indake ong·engon, Sukrobar salo, Khasi Jaintia Christian Leaders Forum (KJCLF)-ni dilgiparangba, a·dokni Chief Minister Conrad K Sangma-ko gronge, a·doko joa kal·aniko niamo ong·atjachina didiangaha.
KJCLF-ni secretary Rev EH Kharkongor-ni parakatani gitade, a·doko joa kal·aniko niamo ong·atna manchiengani gimin uamang a·dokni Chief Minister-ko gronge agangrikon, a·doko joa kal·ani niamrangko ra·gatna skangba, dingtang dingtang dolrang aro a·doko songdongenggipa manderang baksa sorkari agangrikchenggen ine Chief Minister ku·rachakaniko on·ataha.
“A·doko joa kal·ani niamrangko ra·gatna skangba a·dok sorkari, dingtang dingtang dolrang aro a·doko songdongenggipa manderang baksa agangrikchenggen aro ia niamko ra·gatgenchimoba a·doko songdongenggipa manderangko chel·chakna gita niamrangko donskagen ine Chief Minister, chingna ku·rachakaniko on·ataha,” ine Rev Kharkongor parakataha.
Rev Kharkongor-ni parakatani gitade, joa kal·aniara songsalo ong·sianikosan ra·baani ong·aigija mandenaba namgijaniko ra·baani gita ong·ani gimin a·doko joa kal·aniko niamo ong·atna ja·ku de·aniko uamang jegaltokahachim.
