TURA: India a·songni skotong New Delhi songjinmaona dingtang dingtang kamrangna aro sanna bananirangko ra·na re·angenggipa Garo Hills-ni manderang dongchakna man·na gita Garo Hills Autonomous District Council (GHADC)-ni guest house-ko New Delhi-o rikna miksongenga.
Da·o dipet New Delhi-ona re·angenggipa manderang, Meghalaya House-osa dongchakna gita nangtokengachim indiba bang·bata changon a·dokoni re·anggipa manderang bang·rongani gimin mitamrangde Meghalaya House-o dongchakna gita biaprangko man·tokrongjaengachim.
Adita salrangna skangsan, iani bidingo GHADC-ni Chief Executive Membor (CEM) Albinush Marak, High Powered Committee (HPC)-ni Chairman Rakesh Sangma baksa Delhi-ona re·ange, ma·mongni dingtang dingtang dilgiparang baksa agangrikbaaha.
Delhi-ona re·anganio, GHADC-ni dilgiparang, Housing & Urban Affairs-ni Union Minister of State Kaushal Kishore-ko gronge, New Delhi-o GHADC-ni guest house-ko rikani bidingo agangrikbaaha ine kobor on·aha. A·songni skotong songjinmaona re·angani somoirango Garo Hills-ni manderang, dongchakani biaprang dongjae neng·nikanirangko chagrongna nangrongengani gimin Delhi-o GHADC-ni guest house-ko rikna nangchongmotenga ine GHADC-ni CEM Albinush Marak aro HPC-ni Chairman Rakesh Sangma, Union Minister of State Kaushal Kishore-na, Delhi-ni Nirman Bhawan-o aganbaaha.
“India a·songni skotong Delhi songjinmao GHADC-ni guest house-ko rikna a·arangko on·china gita chinga ma·mong sorkarina proposal-ko on·baaha. Garo Hills-ni bang·bea chatro chatrirang, college aro university-rango admission ra·na gita New Delhi-ona re·angrongengani gimin uamangna dongchakani biaprangko nangenga. Garo Hills-oni re·anggipa chatro chatrirang, dam rakgipa hotel-rango dongpana gitade chol ong·jani gimin iandakgipa guest house-rang donggenchimode bilongen dakchakani ong·gen,” ine New Delhi-ona re·ange ma·mong sorkarini dilgiparangko grongegipa GHADC-ni dilgiparang parakataha.
New Delhi-o GHADC-ni guest house-ko rikna man·genchimode ian poraienggipa chatro chatrirangnasan ong·aigija sanna bananiko ra·na re·angenggipa aro dingtang dingtang kamrangna re·angenggipa Garo Hills-ni manderangna bang·a namgni ong·gnokchim ineba GHADC-ni dilgiparang parakataha.
Indake ong·engon, GHADC-ni CEM aro HPC-ni Chairman, ma·mongni Union Environmental Minister Ashwini Kumar Choubey-koba gronge, Garo Hills-ni buring bolgrimrangko tangatpiltaina gita gong kror 308-ni project-na proposal-ko on·baaha ine kobor on·aha.
