SHILLONG: Adita salrangna skang Meghalaya Games-ko ong·atanio kamrang namsrangjahani gimin mikkangchi a·doko dingtang dingtang kal·susaanirangko ong·atanio Meghalaya sorkari an·tangan sokachakna gita tik ka·angaha.
Official-rangni Robibar salo parakatani gitade, Meghalaya Games-ko name ong·atna man·jahani gimin Meghalaya State Olympics Association (MSOA)-ni kamrangna a·dokni Chief Minister Conrad K Sangma aro a·dokni Sports Minister Banteidor Lyngdoh-ba suk ong·gijaniko parakaha.
Meghalaya Games-ko sokachakani aro ong·atani bidingo a·dokni Chief Minister, inquiry-ko dakchina ge·etangan chu·gimik report-ko on·china gitaba ge·etaniko on·angaha ine official-rang parakataha.
Meghalaya Games-ko matchotatani somoio mitam kal·susagiparangnade medal-rangba tikjaha ine koborrangko on·ahachim.
Iandake ia kal·susaaniko sokachakani aro ong·ataniara mikkangchi MSOA-ni gita dal·dalgipa kal·susaanirangko ong·atna man·jawa ine mesokanisa ong·ahachim.
Koborko on·ani gitade, Meghalaya Games-ko ong·atgipa dol, chu·onga gita medal-rangko tarijahani a·sel mitam kal·susagiparangde medal-rangkoba man·pajahachim.
Ia Meghalaya Games-ko ong·atna skangan, a·dokni Sports Minister, MSOA-ni membor-rang baksa tom·aniko ong·atenba, ia kal·susaaniko an·tangari ong·atna man·ama man·jawa uko sing·sandiahachim aro MSOA-ni working president John F Kharshiing baksana general secretary Finely Pariat an·tangan ia kal·susaaniko name ong·atna man·aigen ine Sports Minister-na ku·rachakaniko on·ahachim ine kobor on·timgipa official-rang parakataha.
MSOA-o ka·donge ia kal·susaaniko ong·atahani a·sel Sports department-na aro mongsongbate Sports Minister-na namen kratcha·na nangani ong·aha ineba official-rang aganaha.
Indake ong·engon, ia bilsini gisepo ong·atna sienggipa National Games-koba a·dokni Sports department, an·tangan jako ra·e sokachaknaba dongaha aro kal·susaaniko sokachakanio MSOA, Sports department-na dakchakanirangko on·skanaba dongaha ine official-rang parakataha.
“National Games-ko sokachakaniode iandake chu·sokgijanirangko niktaina nangjawaha, uni gimin sorkari an·tangan jako ra·e sokachakna nangao ga·akengaha,” ine official-rang parakataha.
Meghalaya Games-o bakko ra·na re·anggipa manderangko sel·tagijagipa aro namgijagipa biaprango sokachaksoahani gimin adita salrangna skangsan a·dokni Chief Minister Conrad K Sangma-ba an·tangni suk ong·gijaniko parakatenba, iani bidingo inquiry-ko dakchina ge·etangahachim.
