TURA: Assam aro Meghalaya a·dokni simarango ong·enggipa golmalrangko namatna ja·ku de·anio Meghalaya a·dokni ning·o donggipa mitam songrangko Assam-o napatna gita Assam aro Meghalaya sorkarirang songgigrikaniko dakahani gimin jegalaniko dakna gita re·baenggipa May-ni 16 tariko jinma tom·bimonganiko Mallang Siminaguri songni kal·chakramo ong·atenga ine Mallangkona Joint Action Committee u·iatenba, ia tom·bimonganiona re·bae bakko ra·echina gita Garo Hills gimikni NGO-rangkon mol·molataha.
“A·chik jatni iandakgipa dal·begipa obostao chinga A·chik a·song gimikni bakrimanikon nangnikengani gimin ia manchisogimin salo Mallang Siminaguri songona re·bae ching baksa bakrimaniko on·china chinga Garo Hills gimikni NGO-rangkon mol·molatenga,” ine West Khasi Hills a·jao donggipa Mallangkona Joint Action Committee-ni president parakataha.
Meghalaya a·dok ning·o donggipa bang·a A·chik songrangkon Assam-o napatna tik ka·ahani gimin batanggimin somoirangoba Garo Hills-ni dingtang dingtang NGO-rang, ia songrangona re·ange bakrimanirangko on·ahachim aro ia obostao apsan dakgrikangkuna gita ku·rachakanirangkoba on·ahachim ine nikna man·a.