SHILLONG: Re·baenggipa 2023 bilsini Assembly election-na skang, a·dokni saksni MLA-rang United Democratic Party (UDP)-o napgen ine UDP-ni general secretary Jemino Mawthoh a·kangataha.
Mawthoh-ni parakatani gitade, ia saksni MLA-rang baksa agangrikani kamrang da·o matchotangengaha aro gipin dilgiparangba UDP-o napna gita agangrikna an·tangtangni manderangko watataha.
Gitcham MLA-rangoniba mitam dilgiparang, re·baenggipa anti aro jarango UDP-o napna siengaha ineba UDP-ni general secretary parakataha.
Indake ong·genchimoba ua, UDP-o napna sienggipa manderangni bimingrangkode parakna jechakskaaha.
“Da·o dipet uamangni bimingrangko parakna gita namkujaenga indiba ia MLA-rang, UDP-o napahaon manderang uamangko ma·sina man·tokaigen. Ia cholko ra·e chinga a·dok gimikon UDP-ko bilakbatatna miksongenga,” ine Mawthoh aganaha.
2023 bilsini election ja·man UDP dolan mongsonggipa kal·gipa gita ong·gen ineba Mawthoh, an·tangni ka·dongchakenganiko parakataha.
“Chinga dolsan ong·e bang·bata seat-rangko chegen inede aganjaenga indiba 2018 bilsiko tosusae 2023 bilsiode chingo bang·bata MLA-rang donggnok ine anga namen ka·dongenga,” ine UDP-ni general secretary aganaha.
Congress doloniko ra·gala man·gipa Mawlai-ni MLA Process T Sawkmie-de UDP-o napna manchianiko jinmana parakmanahachim ine nikna man·a.
Ra·galako man·gipa sakgipin Congress MLA Mayralborn Syiem-ba UDP-o napnaba gnang ine jangbingbanganirangko knasona man·ahachim.