SHILLONG: Meghalaya a·dokni Adhoc skulrango skigiparangni dabianiko knachakjaengani gimin Sombar salo, Federation of All School Teachers of Meghalaya (FASTOM)-ni ning·o skigiparang, a·dokni Chief Minister Conrad K Sangma-ko grongna dabie Shillong songjinmani Main Secretariat sambao jingjengataniko dakangaha.
FASTOM-ni dilgipa Mayborn Lyngdoh-ni parakatani gitade, uamang a·dokni Chief Minister-ko grongna gita re·anggipa May 1 tarikon Chief Minister-ni Office (PMO)-o appointment-ko ra·ahachim indiba da·alonan uamangko grongna gita okamkujaengachim.
Chief Minister-ko grongna gita dabie Sombar salo skigiparang, Main Secretariat sambao jingjengatangahaoba da·o dipet a·dokni Chief Minister, Delhi-on ong·skakuengachim ine nikna man·a.
Chief Minister-ni Delhi-ona re·angani gimin skigiparangna CMO-ni gita maming u·iataniko on·jahani giminba Lyngdoh, suk ong·gijaniko parakataha.
Indake ong·engon, Chief Minister-ko grongna gita cholko man·jagenchimode uamang, re·baenggipa May-ni 12 tariko Shillong aro Tura biap damgnion jinma tom·e jingjengatanirangko dakanggen ine FASTOM-ni dilgipa parakataha.
“Chinga dontonggija asonge jingjengataniko dakna gitaba tik ka·manaha aro chingni dabianiko chu·sokate on·kujaskalde darangba ua biaponi ong·katjawa. Chinga Main Secretariat sambaoba asonge jingjengataniko ong·atna jotton ka·gen indiba chingko on·jagenchimode chinga dakdrajawa,” ine Lyngdoh parakataha.
Adhoc skulrango skigiparangni dormahako gong 18,000-chi bariatan baksana bilsiprakon 5 percent-chi bariatchina gita dabitokengon, ia dabianiko chu·sokatna gita sorkari seachi ku·rachakaniko on·jagenchimode May 10 tarik dipet bilakbate jingjengatanirangko dakanggnok ine FASTOM mikrakataniko on·angahachim.
A·dokni adhoc skulrango skigiparangni neng·nikanirangko namatna gita a·dokni Chief Minister Conrad K Sangma an·tangan 2019 bilsini August jao ku·rachakaniko on·ahachim indiba da·o Chief Minister aro gipin dilgiparang, an·tangtangni ku·rachakanirangko chu·sokatna jechaktokengaha ineba Adhoc skigiparang, suk ong·gijaniko paraktokaha.