TURA: West Garo Hills a·jani Chibinang songo donggipa ramarang namsrangjahani a·sel salanti nanga kamrangna re·ruraenggipa manderang neng·nikanirangko chagrongna nangtokenga ine Garo Students Union (GSU) Chibinang unit parakatenba, ia ramako ta·raken tarie on·china dabiangaha.
GSU Chibinang regional unit-ni general secretary Kengkrong B Sangma-ni parakatani gitade, ia Chibinang ramako ru·uta somoirangonin tarichipgija donengani a·sel da·o ia ramani obosta namsrangjaengahachim aro uandaken ia ramako re·ruraenggipa manderang bang·a neng·nikanirangko aro basakobade a·sel ong·anirangko nikna man·engachim.
“Chibinang jolrango dingtang dingtang jatrang meli nangrime janggi tangtokenga aro ia biapara dingtang dingtang songrangni bijangchi gita ong·e ia ramaon pangchakna gita nangtokengachim. Da·o gita gue palani somoio dingtang dingtang songrangoni ia rama gitan gue badinggiparangba re·ruratokengachim indiba ia rama namsrangjahani a·sel gue badinggiparangsan ong·aigija pilak manderangan neng·nikanirangko chagrongna nangtokengaha,” ine GSU Chibinang unit-ni dilgipa parakataha.
Ia ramako tarigija galchipe donengani gimin GSU, dingtangmancha Phulbari-ni MLA SG Esmatur Mominin-koba matnangataha aro ta·raken ia ramako tarie on·china gita dabiataha.
