TURA: Bangladesh a·songona ro·ong salangenggipa truck garirangko Dalu jolni ramarango donengani a·sel ia rama gita re·ruaenggipa manderang neng·nikanirangko chagrongna nangtokenga.
Ro·ong salgipa truck garirangko NH-51 ramarango line ka·e donengani a·selan ia ramako re·ruraenggipa manderang aro mongsongbate pring aro attamo bi·sarangni skulrangchi re·ani aro jokani somoirango apchangket ong·e manderang neng·nikanirangko man·na nangtokenga.
Dalu jolo songdongenggipa manderangni u·iatani gitade, ia ramarango ro·ong salgipa truck garirangko donengani a·sel manderangna kenchakna nangani ong·engani gimin songni manderang changni chang badi ka·ahachim indiba da·alonan maming ja·kurangko de·kujaengachim.
“Ian chingni salanti chagrongna nangenggipa obosta ong·a aro ia ramarango truck garirangko donengani gimin chinga changni chang official-rangna u·iatahaoba mamingkon dakjaenga. Chinga truck garirangko donna gita biaprangkoba sandie on·ahachim indiba truck garirangko ramarangosa dontokaia. Ia truck garirangko gipin biaprango park ka·china ge·etjagenchimode mikkangchi maiba dal·a a·selkon chinga chagrongna siengaha,” ine Dalu-ni chadambe dolko dilgipa Sarbha Marak parakataha.
Ramarango truck gari salgiparangna a·pal re·chakani biaprang dongjani gimin truck driver aro gipin kam ka·giparang ramarangosa skatang re·enga ineba ua an·tangni suk ong·gijaniko parakataha.
“Truck garini manderang, ramarangon song·eba cha·enga aro ramasamrangon a·palba re·enga. Ian ia jolrango songdongenggipa manderangna namen chaktokgijaniko ong·atenga,” ine Sarbha Marak parakataha.
Iani bidingo West Garo Hills a·jani Deputy Commissioner Ram Singh-o sing·sandiaton, ro·ong salgipa truck garirangko donchakna gita uamang biapko sandienga ine parakatskaaha.
“Chinga ia obostani gimin ma·sia indiba songo manderangni on·gipa biapara truck garirangko donna gita namskaja. Ramarang apchangket ong·jana gita biapko sandichina anga Dalu-ni BDO aro SP-na ge·etaniko on·ataha. Purakhasia-oba apsan dakgipa obostakon chagrongna nangenga indiba chinga ia pilaknan ta·raken cholko man·na ka·dongenga,” ine Singh parakataha.