SHILLONG: Re·baenggipa 2023 bilsini Assembly election-na skang Meghalaya a·doko All India Trinamool Congress (AITC)-ni sakbonga MLA-rang, United Democratic Party (UDP)-o napangnaba gnang ine agananiko AITC-ni state president Charles Pyngrope bebera·na jechakataha.
AITC-ni sakbonga MLA-rang, UDP-o napangani cholrang donga ine Indian Political Action Committee (I-PAC)-ni mikrakataniko on·angani ja·man, AITC-ni dilgiparang, a·doko AITC-ni membor-rangko name nirokchina aro doltangko bilakatna gita kamko ka·china AITC-ni state president Charles Pyngrope aro parliamentary party leader Mukul Sangma-na u·iatahachim.
Koborrangko on·ani gitade, AITC-ni sakbonga MLA-rang, chong·motan George B Lyngdoh, Himalaya Shangpliang, Shitlang Pale, Marthon Sangma aro Jimmy D Sangma, 2023 bilsini Assembly election-na skang, UDP-o napskana manchianirang dongengachim.
Meghalaya a·dokni saksni MLA-rang UDP-o napna gita agangrikenga ine adita salrangna skangsan, UDP-ni general secretary Jemino Mawthoh-ba parakatahachim. UDP-o napna sienggipa MLA-rangni bimingrangkode ua parakna jechakskaahachim.
AITC-ni sakbonga MLA-rang UDP-o napna sienga ine jangbingbangenggipa kattarangni gimin janapatengon, Meghalaya a·doko ua AITC-ni state president ong·e, a·doko AITC-ko bilakbatataniara uni daitoan ong·a aro ua an·tangni bil ama gita doltangko bilakatna jotton ka·gen ine Pyngrope parakataha.
“2023 bilsini election-o AITC-ko susaatanian angni mongsonggipa daito ong·enga aro a·dokni pilak dam 60 constituency-rangon chinga susana gita nanggen. Angni daitorangko anga man·a dipet chu·sokatna jotton ka·gen,” ine AITC-ni state president aganaha.
Indake ong·engon, re·baenggipa bilsini Meghalaya Assembly election-o AITC-ko chegipa ong·atna gita uamang rakbee kamko ka·gen ine AITC-ni national general secretary Abhishek Banerjee-ba parakataha.
