TURA: Chatro chatrirangko mikkangchina interview-rangko mikkapangna tarisamsona miksonganio dingtangmancha Tura Don Bosco College-ni final year-o poraienggipa chatro chatrirangna salsani workshop-ko Budbar salo ong·atangaha.
Ia workshop-ko ong·atanio Indian Institute of Bank Management (IIBM)-ni gitcham Director Beryl B Sangma, mongsonggipa skigipa ong·e chatro chatrirangna, interview-rangko mikkangpaani bidingo agan-skie on·angaha.
Ia program-ko ong·atanichi pilak chatro chatrirangan namgniko man·china gita chatro chatrirangko bakgni dakenba ong·atangaha.
Ia workshop-ko ong·atanio IIBM-ni gitcham Director, chatro chatrirangna, maikai interview-rangko mikkangpana nangachim, uarangni gimin talate on·angengon, “Interview-rangara interview-mangmangsan ong·ja indiba ‘outer-view’-ba ong·ani gimin chatro chatrirang an·tangtangni interview-ko mikkangpaengon, pangnan nambatako on·na nanga,” ine aganangaha.
Interview-rangko mikkangpaengon, kenjagokjachina gita chatro chatrirangko didiangengon, pangnan an·tangko dongtoe rakkichina aro mamingnaba kenna gri sing·anirangna aganchakchina Sangma didiangaha.
Interview-rangko mikkangpana re·angengon, pangnan name ba·ra cholarangko ganchina aro man·a dipetde me·asarangde necktie-ko aro me·chikrangde dakmanda-ko ganchina Sangma ku·pattianiko on·angaha.
Ia program-ko ong·atanio Tura Don Bosco College-ni Principal Fr Bivan Rodriques Mukhim, rimchaksoani kattarangko aganangengon, ia workshop-o skie ra·anichi chatro chatrirang, an·tangtangni poraian baksana namgipa dakbewalrangkoba skie ra·na man·gen ine parakangaha.
Ia program-ko Don Bosco College-ni ning·o donggipa History departmentni Head Sangga A Sangma-ni dilanichi ong·ataha.
