SHILLONG: Meghalaya a·doko All India Trinamool Congress (AITC)-ni sakbonga MLA-rang, United Democratic Party (UDP)-o napna miksongenga ine jangbingbanganirangko knasona man·ani ja·man Meghalaya a·doko AITC-ni state president ong·enggipa Charles Pyngrope baksana TMC-ni legislative party leader Mukul Sangma-ko sing·sandina gita AITC-ni gitcham national general secretary Abhishek Banerjee, Kolkata-ona okamataha.
Re·anggipa Budbar salosan, AITC-ni gitcham national general secretary Abhishek Banerjee, Guwahati songjinmao jinma tom·bimonganiko ong·atani somoio, bilsisani gisepon uni party, Meghalaya a·doko sorkariko rikgen ine a·kangani ja·man, Meghalaya a·doko AITC-ni sakbonga MLA-rang UDP-o napskana siengaha ine jangbingbanganiara una namen kratcha·na nangani ong·ahachim. UDP-o napna miksongenga ine jangbingbangenggipa AITC-ni sakbonga MLA-ranga, Shitlang Pale, Jimmy D Sangma, Himalaya Shangpliang, Marthon Sangma aro George B Lyngdoh ong·achim.
Iani bidingo TMC-ni dilgipa saksa, kobor ra·timgiparangna talataniko on·angengon, da·o dipet Kolkata-o tom·aniko ong·atna sienggipa tarikko name tik ka·kujaenga indiba ia May jani gisepon ong·gen ine parakataha.
2021 bilsini November jao, Meghalaya a·dokni gitcham chief minister aro opposition dolni dilgipa Mukul Sangma baksana sak 11 Congress MLA-rang, Congress doloni ong·kate TMC-o napangtokahachim aro untalan Meghalaya a·doko TMC dolan mongsonggipa opposition dol ong·ahachim.
Ua somoioni da·o jadok gapkujaengon, sakbonga MLA-rang AITC-ko wate UDP-o napangna miksongtokenga ine koborko man·soahani gimin TMC-ko dilenggiparang suk ong·jaha ine kobor on·timgiparang parakataha.
