SHILLONG: Meghalaya a·doko North Eastern Hill University (NEHU)-o bak ong·enggipa college-rangko Common University Entrance Test (CUET)-oniko watani bidingo Union Education Minister Dharmendra Pradhan-ni seatgipa chittiko Meghalaya sorkari man·soaha.
Ia chittiko Union Minister, May-ni 11 tariko, a·dokni Chief Minister Conrad K Sangma-na seatahachim.
Ia chittio Union Education Minister-ni parakatani gitade, Meghalaya a·dokni ong·telaigipa biaprangni gimin, a·briari dakgipa biap ong·ani gimin, biaprang chel·ao dongani gimin, chu·onga gita gital kolrang dongjani gimin aro dingtang dingtang cholrang dongjani gimin Meghalaya Chief Minister-ni janapanio pangchake, NEHU-o bak ong·enggipa college-rangode CUET-ko ja·rikgija skango dakbaenga gitan admission-rangko ka·angkuna chol man·gen.
Undergraduate course-na college-rango admission ra·na sienggipa chatro chatrirangna tanggitik CUET porikkako ia bilsi dipet ong·atna parakatani ja·man, chatro chatrirang aro dingtang dingtang dolrangba neng·nikanirangko janape, da·o dipet Meghalaya a·dokode CUET-ko ja·rikkujachina gita a·dok sorkariko didiatani ja·man, a·dok sorkari, iani bidingo ma·mong sorkarina sedoatahachim ine nikna man·a.
Iani bidingo a·dokni Chief Minister Conrad Sangma-ba Union Education Minister Dharmendra Pradhan-ko gronge, NEHU-o bak ong·enggipa pilak private aro sorkari college-rangko CUET-oniko watchina didiangahachim.