BAGHMARA: Meghalaya a·doko gitchambatsranggipa skulrangoni damsa, South Garo Hills a·jani Baghmara Government Higher Secondary School-na gital nokko rikna gita a·dokni Chief Minister Conrad K Sangma, gong kror 4 tangkarangko chamatna ku·rachakaniko on·ataha ine kobor on·aha.
Ia skul nok, mikka balwa ta·rakangani ja·man, namen nosto ong·atako man·ahachim.
Ia bilsini April 30 tariko, mikka balwa ta·rakanganichi ia skul nokni nokkingrang aro mongsonggipa bakrang nosto ka·ako man·ahachim aro uandaken ia skulo poraienggipa chatro chatrirang neng·nikanirangko man·tokna nangengahachim.
Koborko on·ani gitade, ia skulon Baghmara aro South Garo Hills a·jani bang·bata songrangonin ritchani ritcha chatro chatrirang poraitokpaengachim.
Ia skul nokko mikka balwa ta·rakanganio nosto ka·angani ja·man, skul nokko rikpiltaina gita tangka paisarangko on·giltokchina social media-rango u·iatani ja·man, Rongara-Siju-ni MLA Rakkam A Sangma-ba ia skul nokni bidingo a·dokni Chief Minister baksa agangrike, gital skul nokko rikna gita tangka paisarangko chame on·china mol·molaha.
“Da·o dipet skigiparang an·tangtangan ia skul nokko rikpilna gita tangka paisarangko gilchimongtokenga indiba pangkamgipa cholko nangnike anga CM-ko grongeaha aro ia skul nokko rikna tangka paisarangko on·china bi·on ua dakchakaniko on·na ku·rachakataha,” ine Rakkam Sangma parakataha.
Rongara-Siju MLA-ni parakatani gitade, ia skulna gital nokko rikna gita Chief Minister Conrad Sangma, gong kror 4 tangkarangko chame on·na ku·rachakataha.
“Da·o changgipin session-o iani proposal-ko ra·chakgnok ine chinga ka·dongenga aro skul nokko da·o jagni ba jagittamni ja·mande rikna a·bachengatna ka·dongenga. Ian South Garo Hills a·jao aro Baghmara-o lekka porako tang·doatna dakchakaniba ong·genok,” ine Sangma parakataha.
