SHILLONG: Gipin biaprangoni a·dokona re·baenggipa manderangna joa kal·ani aro online betting-ko niamo ong·atna gita National People’s Party (NPP)-chi dilenggipa Meghalaya Democratic Alliance (MDA) sorkarini manchianiko Congress aro Hill State People’s Democratic Party (HSPDP) jegalataha.
Tourist-rangna joa kal·aniko niamo ong·atna sorkarini manchianiko jegalatengon, kajina man·aniko bariatna gitasa iako dakenga ine sorkarini a·kanganina Meghalaya Pradesh Congress Committee (MPCC)-ni working president PN Syiem sing·doataha.
“Kajinako bariatna gita a·dok sorkari gipin cholrangkoba sandina man·achim indide maini giminsa joa kal·aniko niamo ong·atna nangenga? Ian sorkarini kam ka·na changgijaniko mesokani ong·enga,” ine Syiem parakataha.
A·doko joa kal·aniko niamo ong·atani pal, a·doko man·enggipa gipin cholrangko sorkari sandiskana nanga ineba ua aganaha.
Apsan daken HSPDP-ni dilgipa KP Pangniang-ba, a·doko joa kal·aniko niamo ong·atna manchienganiko raken jegalataha aro a·ningni gam-jinrangko bikotna gita a·doktangni niamko ra·gatna ma·mong sorkariko didiskachina gita dabiangaha.
“Joa kal·aniko niamo ong·atanichi bilsio gong kror 1000-na baten kajinarangko man·na dakchakani ong·gen ine sorkari a·kangengoba chinga ia ja·ku de·aniko raken jegalenga,” ine Pangniang aganaha.
Meghalaya a·dokni a·arangara sorkarini ong·ja aro manderangnisa ong·ani gimin Indian Constitution-ni ning·o donggipa Sixth Schedule-ni para 12A(b)-ko taridape, ma·mong sorkarini MMDR Act of 1957-ko a·dokni niam ong·atchina HSPDP nangnikenga ineba ua parakataha.
