SHILLONG: Adita salrangna skang, me·chik saksako cha·ugipa ine potenba, Jowai-ni anti cha·chakgipa biap damsao, kae dongipani bidingo an·tangtangan ja·kuko de·china gita Meghalaya State Commission for Women (MSCW), police-rangko didiataha.
Ia me·chikko krong ge·sao kae donenba sing·sandianirangko dakani video-ko manderang, social media-rango watpripraatani ja·man Jowai Police, ia a·selni bidingo am·sandianirangko dakna a·bachengatahachim.
Ia video-o me·chik saksako ma·sina man·gijagipa manderangni, cha·ugipa ine potenba, jinma sing·sandina rim·ange krong ge·sao kae donako nikna man·ahachim.
Indake ong·engon, iandake niamko jaktango ra·e me·chikko kae donahani gimin aro kragija dake mande jinmani mikkango kratcha·atahani gimin MSCW jegalatenba, ia a·selni bidingo an·tangtangan ja·kuko de·e nanga gita kamko ka·china police-rangko didiataha.
“Chinga MSCW-ni gita iani bidingo police-rang baksa agangrikaha aro ia manderang, ia me·chikko police-rangna pakwate on·ani pal an·tangtangan niamko jako ra·ahani gimin ia manderangni kosako nanga gita ja·kuko de·china chinga police-rangko aganaha. Ia a·selni bidingo nanga gita ja·kuko de·na police-rangba ku·rachakaha,” ine MSCW-ni chairperson Phidalia Toi parakataha.
Skia man·gimin songsalo iandakgipa kamrangara ra·chakna man·gijagipa kam ong·a ine janapatengon, jinmani mikkango uko kratcha·atgipa manderangni kosako FIR ka·china MSCW, ia me·chikko aganahachim ine Toi parakataha.
“Indake ong·genchimoba, ia me·chik FIR-ko ka·na jechakaha, uni gimin an·tangtangan nanga gita ja·kurangko de·skachina chinga police-rangko aganaha. Chinga me·chiknaba agan-ku·pattianirangko on·na a·bachengaha,” ine MSCW-ni chairperson parakataha.
Ia me·chikko cha·ue cha·ronggipa ine manderang matnangtokenga indiba ia me·chikni cha·umitingko rim·gipa manderang an·tangtangan, a·songni niamo pangchake uko police-rangnasa pakwate on·na nangachim ineba Toi parakataha.
Ia a·selni bidingo Jowai Police Station-ni me·chik police officer-ni dilanichi dolsa police-rang am·sandienga ine kobor on·aha.
“Ia a·selko mikrongtangchi nikgipa manderangko police-rang, sing·sandina a·bachengengaha. Mitam manderangni ku·rachakanirangko chinga see ra·manaha. Ia a·selko am·sandienggipa police dol, report-ko on·ahaon chinga niamo pangchake nanga gita ja·kurangko de·gen,” ine West Jaintia Hills a·jani SP Bikram D Marak parakataha.