TURA: Garo Hills-o aro mongsongbate South West Garo Hills a·jao an·cheng kite cha·enggipa manderangara pilakan cholgri ong·giparangsa ong·ani gimin permit ba lease-rangko tarina gita tangka paisa dongpagiparang ong·ja ine Damalgre-oni Garobadha-ona an·cheng kite cha·enggipa manderangni dol parakatenba, an·cheng kitna gita Forest & Environment department-oniko permit ra·china ge·etaniko ra·pilchina a·dokni Chief Minister Conrad K Sangma-ko mol·molataha.
Iani bidingo Damalgre To Garobadha Sand Association-ni Chief Minister-na sedoatgipa chittio janapatani gitade, Damalgre-oni Garobadha-ona an·cheng kite cha·enggipa manderangara maming janggi tangani cholrang dongjae, chengonin an·cheng kite an·tangtangni nokdangrangko aldupaenggipa manderangsa ong·achim aro da·o an·chengrangko kitna gita Forest & Environment department-oniko permit ra·china ge·etani a·sel ia manderang maming janggi tangani cholrang dongjaengahachim.
“Ia songrango donggipa manderang, maming gipin janggi tangani cholrang dongjani giminsa skangonin an·chengrangko kite nokdangrangko chalaipaenga aro ia songni manderang, gipinrangnaba permit-ko tarina on·skajawa. Ia songrango an·cheng kite cha·enggipa manderang kangal cholgrigiparangsa ong·ani gimin permit aro lease-rangko tarina gita tangka paisarangba dongpaja. Uni gimin ia manderangna ka·sachake ia niamko ra·galpilchina aro songni manderangko an·cheng kite cha·na on·china chinga mol·molenga,” ine Damalgre To Garobadha Sand Association-ni dilgiparang, Chief Minister-na sedoataha.
Garo Hills-ni a·kingrangara Nokmarangni nirok sandianio manderangni gam-jinsa ong·a aro ia a·bri jolrangara Constitution-ni Sixth Schedule ning·o chel·chakako man·gipa biaprangsa ong·ani gimin ia biaprangode a·dok sorkari aro GHADC-ba sason ka·na ba niamrangko tarina bil dongja ine adita salrangna skangsan Tura-ni MDC Bernard N Marak-ba parakatahachim aro ia songrango an·cheng kitna niamrangko donatani gimin raken jegalatahachim.
“Chiringrangoniko an·cheng kitaniara maming dakeba samtangtango ong·telaigiparangna nangchakeaniko ra·baja maina chiringrangara jokkame donggipasa ong·ani gimin an·chengrangko man·baaia. Ia manderang maiba ostro ba kolrangko jakkale an·chengrangko kitenga ong·ja aro ianon uamang pangchake janggi tangpaengani gimin iandake an·cheng kitaniko champengataniara manderangni janggi tangani cholko ra·seka gita ong·enga,” ine Marak parakataha.
