SHILLONG: Meghalaya a·dokara lekka porako on·chakgipa a·doksa ong·engoba Meghalaya sorkari, a·doko joa kal·aniko niamo ong·atna jotton ka·enga ine Opposition AITC dolni dilgipa Mukul Sangma matnangataha.
Sangma-ni parakatani gitade, Meghalaya a·dokko lekka pora on·chakani aro gipin biaprangoni re·bagipa manderangni rona namnikgipa biap ine gimik biaprangon mingsing minggamengoba a·dok sorkari, joa kal·aniko niamo ong·atnasa jotton ka·skaengachim.
“Basakoni Meghalaya a·dokko joa kal·anina mingsing minggamna a·bachengaha saoba angna talate on·china. Iandake a·doko joa kal·aniko niamo ong·atna skang sorkari, Isolna kenna nangachim,” ine Sangma parakataha.
Meghalaya a·dokni manderangkode joa kal·chakgipa biaprango napna on·jawa ine sorkari agangipa kattarangni gimin janapatengon, sorkari an·tangan iandakgipa biaprangde manderang rochakna gita chu·ongkujaenga ine sorkari aganskaenga ine AITC-ni dilgipa matnangataha.
Sangma-ni parakatani gitade, Meghalaya aro Assam a·dokni gisepo dal·begipa simarangko sualgrikani gimin ian a·dok damgnini gisepo janggi tangani bewalko songgigrikani gitasa ong·engachim.
Gipin a·dokrangoni bang·bata ma·a paarangan detangtangko poraina gita Meghalaya a·dokona watatengachim ine janapatengon, a·doko joa kal·aniko niamo ong·atahaode sawa ma·a paarang ong·e detangtangko Meghalaya a·doko poraina watatna sikkugen ine Mukul sing·doangaha.
A·doko joa kal·aniko niamo ong·atna soi ka·grikgimin contract-ko den·galpilchina uamang nangnikenga ine janapatengon, iandakgipa kamrangko a·bachengatanichi a·dokni mingsing minggamaniko uamang bon·atna sikja ine Sangma parakataha.
Ia songgigrikaniko sorkari da·o den·galpiljagenchimode 2023 bilsini Assembly election-ni ja·mano ia songgigrikaniko bon·atskagen ineba Sangma parakataha.