TURA: West Garo Hills a·jao Meghalaya New & Renewable Energy Development Agency (MNREDA)-ni district project officer-ko kamo rakkianio Constitution-ni niamrangko ja·rikgijasa rakkiaha ine Kharkutta-ni saksa George Sangma, a·dokni Chief Secretary-na badi ka·e sedoatenba, ia mandeko kamoniko ra·galpilenba, gital dake ia kamna porikka aro interview-rangko ong·atchina didiataha.
Sangma-ni Chief Secretary-na badi ka·doangani gitade, sorkarini pilak kamrangon, darangnaba mikkang niteani aro jat-torom baseani gri pilaknan cholko on·chengesa kamko on·china gita Constitution-ni Article 16 (1)-o janapani gnangchim indiba West Garo Hills a·jao MNREDA-ni district project officer-na kamko on·anio maming advertisement gri, porikka aro interview-rangko ong·ata gri saksa Jawairiya Islam minggipa me·chikna kamko on·ahachim.
“Ia kamna maming u·iatchenganiba dongjaha aro ia kamna porikka ba personal interview-ko ra·aba dongjaha. MNREDA-ni project officer-nade electricals-ni gimin u·i-ma·sigipa, chong·motan B.Tech (Electrical) donggipa mandekosa nangachim indiba ia kamo donatako man·gipa Jawairiya Islam-de ia poraiani gadang donggipaba ong·jachim,” ine Sangma parakataha.
Iandake kamko on·aniara a·songni dongimin niamko pe·ani gita ong·enga ine janapatengon, janapgimin mandeko kamoniko ra·galpilenba, ia kamna gital dake advertise ka·china aro porikkarangko ra·china Sangma didiataha.
Adita salrangna skangsan, iani bidingo FKJGP dolba West Garo Hills a·jani Deputy Commissioner-na sedoatahachim aro ia mandeko kamoniko ra·galpilenba gital dake porikkako ra·china didiatahachim ine nikna man·a.
