FOCUS-ni ning·o game ge·e cha·giparangna gong kror 220-ko sorkari chama: CM

TURA: Salgro salaram a·dokrango game ge·e cha·enggiparangni dal·batsranggipa scheme, FOCUS program-ni ning·o a·dok sorkari, gong kror 220-ko game ge·e cha·giparangna chame donaha aro ian a·doko sak lak 4.5 game ge·e cha·giparangna namgni ong·gen ine Sombar salo, a·dokni Chief Minister Conrad K Sangma parakataha.
A·dok sorkarini game ge·e cha·giparangna miksonge ra·gatgipa FOCUS program-ni bidingo manderangna ma·siate on·na gita a·dokni Chief Minister, a·dokni dingtang dingtang biaprangona wenroroengon, Sombar salo ua, East Garo Hills a·jani Rongjeng songo game ge·e cha·giparang baksa agangrikengmiting somoio iako jinmana parakataha.
Batanggimin bilsignini gisepo COVID-19 sajinmani a·sel game ge·e cha·enggipa manderang neng·nikanirangko chagrongna nangtokahani gimin, game ge·e cha·enggipa manderang, an·tangtangni gama ge·ani kamrangko a·bachengpiltaina man·na gita ia FOCUS program-ko a·dok sorkari a·bachengataha ineba ia tom·anio Chief Minister parakataha.
Chief Minister-ni parakatani gitade, ia FOCUS program-ni ning·o game ge·e cha·enggipa manderang sak 10-oni sak 20-ona dol dake producer group-rangko bikotna nanga aro ia producer group-rangna membor sakprako gong 5000/- ka·e hisapenba, dol dal·a dal·jani kri, sorkari tangka paisarangko on·enga.
Ia FOCUS-ni ning·o on·enggipa tangka paisarangara loan-rangsa ine Rongjeng jolrango ma·sisrettokengani gimin talataniko on·angengon, ia tangka paisarangara loan ong·ja indiba sorkarini dakchake on·enggipa tangka paisarangsa ong·a ine game ge·e cha·giparangko ma·sisretjachina aro sorkarini on·enggipa dakchakanirangko ra·china Sangma didiangaha.
Milk Mission, Piggery Mission, Poultry Mission, Ginger Mission, Goatery Mission aro uandakgipa program-rangni ning·o sorkari, gong kror 1000-na baten game ge·e cha·giparangna dakchakanirangko on·enga ineba ia tom·anio Chief Minister parakataha.
Bilsisana skang a·bachengatgipa FOCUS program-chi a·dok gimikon game ge·e cha·enggiparang namgnirangko man·engaha aro an·tangtangni game ge·e cha·anirangko a·bachengpiltaina gita tangka paisarangko man·engaha ineba Chief Minister parakataha.