Casino, race course, online gaming-ni GST-ko bariatna tik ka·a: Conrad

SHILLONG: Casino, race course aro online gaming-ni GST-ko Group of Ministers (GoM), 28 percent-ona bariatna tik ka·aha ine Budbar salo, GoM-ni convenor aro Meghalaya a·dokni Chief Minister Conrad K Sangma parakataha.
Ia Group of Ministers (GoM) ba dolsa minister-rangko, casino, race course aro online gita joa kal·atanina GST-ni damrangko am·sandichina India sorkarini Finance Ministry songe donangahachim aro ia GoM-ko dilna gita Meghalaya a·dokni Chief Minister Conrad Sangma-ko convenor songahachim.
Ia GoM ba minister-rangni dolo bak ong·paenggipa gipin membor-rangara, Maharashtra-ni Deputy Chief Minister Ajit Pawar, West Bengal-ni Finance Minister Chandrima Bhattacharya, Gujarat-ni Finance Minister Kanubhai Patel, Goa Panchayati Raj-ni Transport Minister Mauvin Godinho, Tamil Nadu-ni Finance Minister Dr Palanivel Thiaga Rajan, Uttar Pradesh-ni Finance Minister Suresh Kumar Khanna aro Telangana-ni Finance Minister Thanneeru Harish Rao ong·engachim.
Indake ong·engon, casino, race course aro online gaming-ni GST rate-rangko nipiltaina aro ia kal·anirangko nangchakegipa kamrangni gimin chanchirimna gita Budbar salo, ia GoM-ni tom·aniko ong·atangtaiaha aro uandaken casino, race course aro online gaming-ni GST rate-ko 28 percent-ona bariatna tik ka·aha ine kobor on·aha.
GoM-ni convenor Conrad Sangma-ni parakatani gitade, Casino, race course aro online gaming-ko chalaianio sorkarirang, dingtang dingtang industry-rang, joa kal·anio bak ong·enggipa dolrang aro songsalrangba bak ong·pana nanggen ineba ia tom·anio GoM-ni member-rang tik ka·e donangaha.

Get real time updates directly on your device, subscribe now.

Comments are closed.