TURA: Garirango nangana bate manderangko ba bosturangko gate salengani a·sel bang·a changon a·sel ong·anirangko nikna man·rongengani gimin garirango nangana bate mande ba bosturangko saljachina North Garo Hills a·jani police-rang, mikrakataniko on·angaha.
North Garo Hills Police-ni Facebook Page-o parakatani gitade, mande aro bosturangko salruragipa garirang, jekai Mahindra Pik-up, Truck, Tata Magic aro uandakgipa dingtang dingtang garirang nangana bate manderangko aro bosturangko salruraengani a·sel namgijagipa obosta ong·anirangko ba accident ong·anirangko nikna man·enga aro bang·a changon manderangni gamchatbegipa janggirang gimaataona sokrongengachim.
“Manderangko salruragipa dal·dalgipa garirangsan ong·aigija bike aro scooty-rangko salgiparangba dongimin niamna bate manderangko gate salenga, uni gimin iandake garirango ba bike, scooty-rango niamko manigija nangana bate salgenchimode, Motor Vehicle Act aro Indian Penal Code-ni ning·o dongimin dingtang dingtang niamrango pangchake, gari salgiparangni kosako sastiko on·gen,” ine North Garo Hills Police, mikrakataniko on·angaha.
Niamrangko ja·rike gari gorarangko salanichi a·sel ong·anirangko aro janggirangni gimaaniko champengna man·gen ineba NGH police-rang parakataha.