TURA: Asanang constituency-o matchotgijagipa kamrangni gimin Williamnagar-oni saksa Nilbath Ch Marak-ni badi ka·aniko man·ani ja·man, chu·sokatgijagipa kamrangni bidingo inquiry-ko dakchina Meghalaya Lokayukta ge·etaniko on·angaha.
Marak-ni badi ka·gipa case-ko Lokayukta-na on·atpilani ja·man, re·anggipa May 18 tariko iani bidingo hearing-ko dakenba, ia matchotgija donenggipa kamrangni bidingo inquiry-ko dakchina Meghalaya Lokayukta, a·dokni Director General of Police (DGP)-ko ge·etangaha.
Ia case-ni bidingo Marak-ni talataniko on·angani gitade, Asanang constituency-ni ning·o GHADC-ni ming 49 project-rangko jolni contractor sakgnina on·ahachim indiba ia ming 49 project-rangoni Balupara songni gopramo nok te·sa aro Daljagre songo chi tengki ge·sakosan rike matchotataiahachim.
Ia project-rangni bidingo RTI-ko ka·on, 2017-18 bilsirango ia ming 49 project-rangko 16-Asanang MDC constituency-na on·ahachim aro ia gimik project-na gong kror 1 tangkarangko chamahachim ine ma·sina man·aha ineba Marak parakataha.
