HNLC-ni dilgipako so·otani bidingo inquiry dakani report-ko sorkarina pakwata

SHILLONG: Hynniewtrep National Liberation Council (HNLC)-ni gitcham dilgipa Cheristerfield Thangkhiew-ko police-rangni so·otgipani bidingo Meghalaya Human Rights Commission (MHRC)-ni Chairperson Justice T Vaiphei-ni dilanichi inquiry dakgipa Commission, Sukrobar salo, inquiry report-ko a·dok sorkarina pakwate on·angaha.
Ia inquiry-ko MHRC-ni Chairperson Justice Vaiphei saksan dakahachim aro report-ko ua Sukrobar salo, a·dokni Chief Minister Conrad K Sangma-na pakwate on·angaha.
Ia report-ko Chief Minister-na pakwate on·angani ja·man kobor ra·timgiparang baksa agangrikengon, ian dongnuna nanggipa report-sa ong·ani gimin report-o segimin kattarangko parakna man·kujawa ine Justice Vaiphei parakataha.
Ia a·selni bidingo inquiry-ko matchotatna gita jadok somoiko nangaha aro ia jadokni gisepo chang 20 hearing-rangko dakaha ineba Justice Vaiphei parakataha.
Ia inquiry-ko matchotatna on·gimin somoi bon·ahani gimin jagittam somoiko sorkari, ia Commission-na on·dapahachim aro inquiry dakanio komibeoba sak 12 sakkirangko ia commission, sing·sandiahachim.
“So·ota man·gipa mandeko post mortem ka·gipa medical officer-ko man·chape sakbonga sakkirangko anga sing·sandiaha aro unbaksa sakbri police officer-rangkoba anga sing·sandiaha. So·ota man·gipa mandeni nokdangonikoba anga sakbongako sing·sandiaha,” ine Justice Vaiphei aganaha.
Da·o iani kamde sorkarini jakosa ong·aha ine janapatengon, ua inquiry-ko name dakna jotton ka·aha aro sorkarina on·gipa report-o ua an·tangba chu·ongnikaiaha ine MHRC-ni Chairperson parakataha.
“Angni nikani gitade anga ia inquiry-ko matchotatna an·tangni bil ama gita kamko ka·aha aro da·ode ia sorkarini jakosa ong·aiaha,” ine Justice Vaiphei aganaha.
Re·anggipa 2021 bilsini August 13 tariko HNLC-ni gitcham dilgipako police-rangni so·ote galani ja·man Shillong songjinmao ding·chaoanirang ong·katahani gimin ia a·selni bidingo judicial inquiry-ko dakchina Meghalaya sorkari ge·etangahachim.
HNLC-ni gitcham general secretary Cheristerfield Thangkhiew-ko 2021 bilsini August 13 tarik pringwalo, uni dongchakenggipa nokona re·ange police-rang so·otahachim ine nikna man·a.
Police-rangni u·iatani gitade, re·anggipa bilsio Shillong songjinmani Laitumkhrah-o IED bomako gopretanio jak dongani gimin police-rang uko rim·nasa uni nokona re·angahachim indiba ua police-rangko churichi chadrappangpilna jotton ka·ahani giminsa police-rang uko gochakna nangahachim.
Indake ong·genchimoba police-rangni agangipa kattarangko dingtang dingtang dolrang bebera·na man·jae, iani bidingo inquiry-ko dakchina sorkario dabiskaahachim.