‘No ILP No Rest’ ingipa kattachi Union Education Minister-ko rimchaksoa

SHILLONG: A·doko ILP-ko ra·gatna dabienggipa KSU-ni dolrang All NEHU Workers Union (ANWU)-ni memborrang baksa bakrime Sonibar salo North East Hill University (NEHU)-o Union Education Minister Dharmendra Pradhan-ko ‘NO ILP NO REST,’ ba ‘ILP-ko man·kuja dipet neng·takjawa’ ingipa kattachi rimchaksoaha.
Indake Union Minister, ILP-ko dabie jingjengatgiparangko nike garitangoni ong·kate, uamangni kattarangko knae ra·aha aro ia mamlako ma·mong baksa agangrikna ka·dongataha.
KSU activist-rang, “Manipur-ode BJP bilona sokani jolan maidake ILP-ko man·jolaha, indiba Meghalaya-nade maina ILP-ko on·ningjaenga. A·dokni manderang badita sal -somoirangonin dabienga resolution-koba pass ka·aha indimangba maina da·onan on·kujaenga, ine Minister-o sing·aha.
“Legislative Assembly, resolution-ko pass ka·pilaha indiba da·onan Meghalaya-na ILP-ko on·kujaenga, uni gimin chinga ILP-na dabiangkuaigen ine KSU-ni Assistant Organising Secretary Pynkmen Sanmiet aganaha.
Chinga ma·mong minister baksa mikkanggrike an·tangtangni kattarangko donna man·ahani gimin kusi ong·aha, ia chingni dabiani indin ong·ramaijawa ia changde chingni kattako knachakgen ine ka·dongsoenga ineba agandapangaha.
All NEHU Workers Union (ANWU) president, Napoleon Mawphniang, indine aganskaha, “Bilsi chiking baten casual-o kam ka·giparang donga, da·onan regularise ka·jaenga, uni gimin suk ong·jae chingni kamrangko regularise ka·china mol·mole VC-na chittiko seaha. NEHU-o bang·arang bilsi 20-30 baten casual-o kam ka·giparang donga, da·onan regularise ka·kuja.”
“Re·anggipa jaon chinga memorandum-ko on·aha, chingni dabie chitti segipana aganchakna gita sal 30 somoiko on·aha jean May 29 tarikode bon·gnok. Indakmitingon Union Education Minister a·dokona sokbaaha, iandakgipa somoio chinga cholko ra·e chingni dabianirangko u·iatna jingjengatna chanchiaha.”
Uandake chingni on·gipa somoio bon·ahaon an·tangtangni right-na niamo pangchake kamrangko ka·anggen.
Indake ong·engon mitam casual worker-rangni mahari-ma·drang jemangan NEHU-o officer-ni rank-o kam ka·giparang donga, uamangde bilsi 5-10-ni gisepon regularise ong·enga, NEHU Shillong campus-on sak 500 baten casual worker-rang donga. Tura-oba apsan daken jingjengataha, ine ANWU-ni president aganaha.