Tura: Sonibar May 21 tariko saksa Private contractor-na kam ka·gipa electricity worker ba bijolio kam ka·gipa saksa electricity line-ko tarimitingo siaha. Bilsi 32 ong·gipa Meher Ali, Teporpara minggipa songoni ong·achim. Jolni manderangni aganani gitade, Meher Ali, ua jolni BPL nokdangrangna smart meter-ko tekna gita re·bahachim aro jolni lineman-na kobor on·a dongjakon.
Indake ong·engoni ua jolni MeECL team, ia ong·gipa a·selni gimin mamingkon aganata dongkujaenga. Ua bijoli line-ko tarina gadoahachim indiba ua somoio tanggitik electricity line-ko on ka·atani a·sel ua janggitangko gimaatna gita nangaha.
Atamni somoio 5 bajimango ia a·sel ong·aha, bijolio kam ka·gipa jean MeECL-na contractor-ni contract-o electric line nosto ong·an somoirango kam ka·gipa ong·achim. Ua mande, an·tangan bijoli nange siaha. A·sel ong·ani video aro noksarang gipaha. Sianggipa mandeni manggisiko electric line-ona dingdee dongako nikna man·aha.
Line-ko tarimitingo maidake bijoliko on ka·na man·a, switch off ka·e donna nangachim, haida agan-golpogrikanio meligrikja ba ma·sisretani ong·ahakon. Jeni a·sel kam ka·miting somoion electric line-ko on ka·aha. Aro kam ka·gipa sina gita nangaha. Indake ong·eon adita somoini ja·man sianggipa mandeni manggisiko line-oniko ra·onaha.
South West Garo Hills (SWGH)-ni superintendent of police Siddhart Ambedkar-ni koborna u·iatani gitade, ia mamlako talbate u·ina sandikuenga.
“Sianggipa mandeni line-o kam ka·mitingo saoba u·igija on ka·ataha. Jeni a·sel ua jolan siaha, ia mamlako talbate u·ina sandienga ine SP, parakataha.
Garo Hills-o mikka balwa jimanichi bang·a jolrangon bijoli sianichi manderang neng·nikako man·tokenga. SWGH-ni bang·a jolrangon bijoliko watkujaenga. Iandakgipa kenbegnigipa obostani a·sel ia mamlako bon·atja dipet bijoli line-ko tarinio somoi nangdapnaba gnang.
