SHILLONG: Sorkarini ong·gija kam ka·anirangko nikoba jripmittipsa dongaia ine an·tangni kosako matnanganirangko, a·rikgala man·gipa Congress MLA, Ampareen Lyngdoh jechake aganaha, jean da·omitingo MDA Sorkarina chakpaengachim.
Manderang, angko mitam mamlarangna nom·jawa ine da chanchi, indiba mitam mamlarangnade anga raken aganchakenga, Lyngdoh aganaha.
“Kam on·anirangko, shelf help group-rangko songaniko aroba game cha·giparangna tangka on·anirangko nike anga kusi ong·a, anga maina jrip dongjawa,” Lyngdoh aganaha, niamgri koela bikote palani mamlani bidingo aganskaengon, ango iana aganna gita bil dongjani gimin, iani bidingo chanchiaba dongja ine ua agandapaha.
Indake Court-oniko ge·etaniko man·ani gimin sorkari tik ong·gijanirangko tik ong·atna kamrangko ka·enga aro court-ni ge·etaniko ja·rikgen ine ka·dongenga, ua aganaha.
ISBT-ko rika namja ine matnanggipani bidingo uni mamingkoba agangija dongani gimin aganengon, anga ISBT-ona re·angaba dongja indide manderang angako maidake jrip dongaia ine agana man·gen, Lyngdoh aganaha.
Sorkarini kosako matnanganirangna jrip dongaia ingipani gimin aganchakengon, sorkarini ong·gija dakarangna ua mamingsaloba jrip dongja, maiba ong·gijako dakode ua pangnan MDA Sorkarina pangnan agangronga, Lyngdoh aganaha.
