\TURA: Sonibar salo, Tura-ni MP Agatha K Sangma, South West Garo Hills a·jao donggipa Mahendraganj-ni Jawahar Navodaya Vidyalaya (JNV)-ko nieaha aro uni Mahendraganj JNV-ko nieani somoio, South West Garo Hills a·jani Deputy Commissioner SK Marak, SP SK Ambedkar, EAC SR Marak aro gipin officer-rangba dongpae bak ra·angaha.
Ia tom·anio Mahendraganj JNV-ni Principal Naseem Ahmed, JNV-o nanganirangko Tura MP-na talate on·angengon, ia jolrango bijolirang sirongengani a·sel neng·nikanirangko man·na nangengani gimin dakchakaniko on·china, chirangko chu·onga gita man·jaengani gimin chirangko sale on·china, block damgnini ramao dolongko rike on·china, JNV-na kal·chakani biapko on·china aro multi pupose hall-ko rike on·china mol·molangaha.
Ia tom·anio Tura-ni MP Agatha K Sangma, jinmana aganprakengon, JNV-ni nanganirangko chu·sokate on·na ku·rachakanirangko on·angan baksana mikkangchi ia skulko namroro silroroatchina skulko chalaienggipa aro skigiparangko didiangskaaha.
Skulo poraienggipa chatro chatrirangkoba chu·sokgiparang ong·na gita rake poraichina ua didianiko on·angaha.
Tom·a matchotani ja·mano, Tura-ni MP aro dingtang dingtang official-rang, India a·songni gitcham Prime Minister aro Navodaya Vidyalaya-ko man·e on·chengdilgipa Rajiv Gandhi-ni siani salko gisik ra·na gita, dingtangmancha mande ra·pilskaaniko dakangaha.
