SHILLONG: New Shillong Township-ni Mawdiangdiang-o gital rikenggipa Assembly building-ni ‘dome’ Robibar pringwalo be·gruahani gimin a·dokni BJP dol, raken jegalataha aro iani bidingo manderang kakketko ma·sina man·na gita inquiry-ko dakatchina sorkario dabiangaha.
Mawdiangdiang-o gital rikenggipa Assembly building-ni dome, Robibar pringwalni 12:30 bajimango be·gruahachim indiba rasong gnange ia a·sel ong·anio darangba janggiko gimaatna aro saknaanirangko man·na nangjahachim.
PWD (Building)-ni Executive Engineer Ransom Sutnga-ni, kobor ra·timgiparangna parakatani gitade, ia dome namen jregipa ong·ani gimin ia gital Assembly building-o dome-ko songna design tariani chu·ongjahani a·selsa ia dome be·gruna gita nangahachim. Ia dome-ni chuaniara metre 65-mang ong·engon, minar-ni chuaniara metre 13-mangsan ong·skaaiachim aro ia dome-ni jreaniara ton 70-mang ong·achim ineba PWD official parakataha.
Ia be·grugimin jabolrangko rongtalatna gita komibeoba antignimangkode nanggen aro da·o ia gital Assembly building-ko matchotna gita komibeoba jachet ba jasku somoirangkode nangdapgnok ineba official parakatahachim.
Indake ong·engon, ia gital Assembly building-ko rikanio bang·bea tangka paisarangko koros ka·na nangahaoba iandake be·gruaniara namen kragijani ong·aha ine BJP-ni state president Ernest Mawrie parakatenba, ia a·selni bidingo CBI-chi inqury-ko dakatchina sorkario dabiangaha.
“Da·o ong·enggipa sorkario BJP bak ong·paengoba chinga iandake tangka paisa jakkalsretanirangko jrip nie dongna man·jawa. Chinga a·bachengonin tangka paisa jakkalsretanirangko bon·atna ku·rang on·enga aro iako a·dokni manderang pilakan nikenga. Chinga mikkangchiba iandakgipa kamrangko nie dongna man·jawa,” ine Mawrie parakataha.