SHILLONG: Meghalaya a·dokni SSA skulrango skigiparang aro Mid Day Meal (MDM) worker-rangni nangnikanirangko chu·sokatna gita cholko sandigen ine Sonibar salo, Union Education, Skill Development aro Entrepreneurship Minister Dharmendra Pradhan, a·dokona re·baani somoio ku·rachakaniko on·angaha.
SSA skulrango skigiparang, an·tangtangni dormaharangko somoi gita man·rongjaengani gimin aro MDM worker-rangba an·tangtangni man·gnirangko bariatchina dabie jingjengatanirangko dakengachim ine nikna man·a.
Iani bidingo kobor ra·timgipa manderang baksa agangrikengon, SSA skulrango skigiparangni aro MDM worker-rangni neng·nikanirangko Meghalaya a·dokni Education Minister Lahkmen Rymbui, uko grongani somoion janapaha aro ua skigiparangni aro MDM worker-rangni nangnikanirangko chu·sokate on·na cholrangko sandigen ine Union Minister parakataha.
“India sorkari aro Meghalaya sorkari dolgnian, lak 15 chatro chatrirangna mongsonggipa daitoko done kamko ka·engani gimin chinga uamangni nanganirangko chu·sokatna cholrangko sandigen,” ine Pradhan aganaha.
Re·anggipa Sukrobar salosan, Meghalaya a·dokni Chief Minister Conrad K Sangma-ba, SSA skigiparangni dormaharangko somoi gita on·na man·na gita a·dok sorkari, ma·mong baksa agangrikangkugen ine parakatahachim.
Chief Minister-ni parakatani gitade, Meghalaya a·doko SSA-ni kamrangna 80 percent-ni gita tangka paisarangkon ma·mong sorkarionisa on·atengachim.
