SHILLONG: New Shillong Township-ni Mawdiangdiang-o rikenggipa gital Assembly building-ni protchong (dome) be·gruani gimin Mongolbar salo High Powered Committee (HPC) tom·e chanchirimangenba, iani bidingo third party audit-chi am·sandianirangko dakatna tik ka·e donangaha.
HPC tom·a matchotani ja·mano kobor ra·timgipa manderang baksa agangrikengon, ia building ba nokni protchong be·gruaniko am·sandian baksana audit dol, dingtangmancha ia gital Assembly building-ni right wing, left wing, corridor, reception area, Speaker aro Chief Minister-ni chamber-rang, building-ni ka·mabatgipa gadang aro basement-ko man·chape ia nokko naljoke aro bilakbate rikna gitaba kamrangko nianggen ine Assembly-ni Speaker Metbah Lyngdoh parakataha.
Ia building-ko rikanio, IIT Guwahati, IIT Kolkata aro IIT Delhi-ni dakchakaniko ra·na gitaba uamang tik ka·angaha ineba Assembly Speaker parakataha.
Lyngdoh-ni parakatani gitade, ia dolgittam IIT-rangoni dolsa audit-ko ka·gen aro ia IIT-rangna seatchina gita HPC, a·dokni PWD (Building)-na ge·etaniko on·aha.
Ia inquiry-ni report-ko uamang ta·raken man·na gita nangnikenga ine janapatengon, audit ka·gipa dolni report-ko man·kujaskal, Assembly building-ko rikani kamrangko dontongatchenggen ine Assembly Speaker parakataha.
Da·o dipet darangkoba ia nok ning·chi napna on·kujawa ine janapatengon, ia building ning·o chirang napjana gita be·grugipa chu·gimik protchong jol gimikkon kapenge donna gita tik ka·angaha ine Lyngdoh parakataha.
Ia HPC-ni tom·anio, a·dokni Chief Minister Conrad K Sangma, Opposition dolni dilgipa Dr Mukul Sangma aro committee-ni member Ampareen Lyngdoh-ba dongpae bak ra·angahachim.
Assembly building-ni protchong be·gruaniko third party audit am·sandigen: Speaker
Date:
Share post:
