SHILLONG: Re·anggipa 2021 bilsio All India Trinamool Congress (AITC)-o napanggipa mitam Congress MLA-rang, re·baenggipa 2023 bilsini Assembly election-na skang, Aam Aadmi Party (AAP)-o napna miksongtokenga ine kobor on·aniko AITC-ni Meghalaya president Charles Pyngrope jegalataha.
Meghalaya a·doko AITC-ni mitam MLA-rang, AAP-o napna miksonganirang dongenga ine koborrangko man·soenggipani bidingo sing·on, da·o dipet ua iani gimin maming kobor dongkuja ine Pyngrope parakataha.
Indake ong·genchimoba, re·baenggipa bilsini election-na skang, doltangtangoni gipin dolrango napna miksongenggipa mitam MLA-rangde, a·dokni mitam MLA-rangko AAP-ni dilgiparang grongeaha ine parakatskaaha.
Meghalaya a·dokni mitam MLA-rangko AAP-ni dilgiparang grongna jotton ka·aha ine kobor on·timgiparang parakataha.
Da·o dipet Meghalaya a·doko MLA-rang, AAP-o napna miksonganirang dongja indiba mitam MLA-rangde ja·mano an·tangtangsa AAP-o napskanaba gnang ineba kobor on·timgiparang u·iataha.
Congress-oniko ra·gala man·gipa sakbonga MLA-rang, gipin sak 23 membor-rang baksa, adita salrangna skangsan, AAP-chi sason ka·enggipa Punjab a·dokona re·ange, AAP-o napskaani cholrangko parakaha ine koborko man·soahachim.
Ia MLA-rangoni mitamde Punjab a·dokon dongrikenba, ma·mongo AAP-ni dilgiparangkoba grongjolaha ineba kobor on·timgiparang aganahachim.
Punjab a·doko cheani ja·man national party-ni bimingko man·na gita AAP dolba raken kamko ka·enga aro uandaken Meghalaya a·dokoba AAP-ko ja·dil su·na miksonganirang dongengaha ine kobor on·timgiparang aganaha.
