M’laya a·dokni PWD (Building) Minister kamtangko watna jechaka

SHILLONG: Adita salrangna skang, Shillong songjinmani Mawdiangdiang-o gital rikenggipa Assembly building-ni protchong be·gruani bidingo a·dokni PWD (Buildings) Minister Dasakshiatbha Lamare, kamtangko watna jechakataha.

“Anga kamtangko watjawa maina angni kam watanichide maming namgniko ra·bana man·jawa. Iandakgipa a·selrang ong·na nanggenchimode je minister ong·genchimoba ong·aigen,” ine Lamare parakataha.

Kamtangoni an·pilanikode ua bebera·ja ine janapatengon, batesa ua da·o kamtangko rakbate aro nambate ka·na miksongenga ine PWD (Buildings) Minister parakataha.

Meghalaya a·dokni dingtang dingtang project-rangko nirokna gita monitoring committee-ko songchina dabianikoba ua ra·chakangaha.

Gital Assembly building-ni protchong be·gruani gimin ua ta·raken UPNRNNL-na sedoatenba, uko, Chief Minister-ko aro Speaker-ko grongechina aganatgen ineba Lamare parakataha.

“Mijal High Powered Committee-ni tom·anio uamangoniba saoba dongpaaha ine angna aganaha indiba iako anga chu·ongnikja. Ta·raken uamangni mande saksako watatchina anga uamangna seatgen aro chinga apsan iani bidingo agangrikgen,” ine Lamare aganaha.

Ia gital Assembly building-ni bidingo audit ka·china gita bakan uni department, IIT-rangna sedoatgen ine janapatengon, ia gital Assembly building-ni protchong be·gruanio koros ong·anina ia nokko rikenggipa company an·tangan korosko gamna nanggen ine PWD (Buildings) Minister parakataha.

Get real time updates directly on your device, subscribe now.

Comments are closed.