M’laya a·doko matchu be·en man·aniko bariatna livestock project-ko a·bachengata

SHILLONG: Meghalaya a·doko songdongenggipa manderang matchu be·enna gipin biaprangosa pangchakna nangbatengani a·sel be·enrangko chu·onga gita man·jaengani gimin Budbar salo, a·dokni Chief Minister Conrad K Sangma, dingtangmancha livestock project-ko Upper Shillong-o a·bachengate on·angaha.

Ia project-ko a·bachengatna gita dingtangmancha tom·aniko Animal Husbandry & Veterinary department ong·atangaha aro ia tom·anio a·dokni C&RD Minister Hamletson Dohling-ba dongpae bak ra·angaha.

Ia tom·anio Sex Sorted Semen AI Program baksana Andhra Pradesh-ni Ongole rokom baksa joltangni matchurangko jildimani project-koba a·dokni Chief Minister a·bachengate on·angjolaha.

Ia tom·anio IDP project-o jile man·gipa F1 Male Calf ba matchu bipa bi·sarangko dam 12 a·jani dam 12 model songrango matchu matterangko jile kae cha·enggiparangna suale on·angjolaha.

Shillong Milk Union-ni Na Ri dudnaba ia tom·anio ua ISO certificate-ko on·angaha.

Ia livestock project-ko a·bachengate on·angani somoio a·dokni Chief Minister, jinmana aganprakengon, Meghalaya a·doko 70 percent-ni gitade game ge·e cha·enggiparangan ong·ani gimin sorkari, game ge·e cha·enggiparangkon mikkango done kamko ka·enga ine parakangaha.

Game ge·e cha·enggipa manderangni man·gniko bariatna gita sorkari, dingtang dingtang cholrangko ra·gatenga ine janapatengon, game ge·e cha·enggipa manderangni neng·nikanirangko namatna man·genchimoba uamangni man·gnirangkoba bariatna man·gen ine Chief Minister parakataha.

Matchu matterangni bi·sa ba·aniko bariatna gita sorkarini ra·gatgipa ‘Artificial Insemination’ (AI)-ni gimin talataniko on·angengon, ian gital technology ba kol ong·ani gimin a·doko matchu matterangko jile cha·enggipa bang·bata manderangan ia kolko ra·chakkujaenga indiba ia AI-ko daka changantian sorkari, jile kae cha·enggipa mande sakpraknan gong 500-ko on·gen aro iana sorkari, gong krorgni tangkarangko chame donmanaha ine Chief Minister parakataha.

Meghalaya a·dokni manderang matchu be·enna gipin biaprango pangchakna nangjana gita, West Jaintia Hills a·jani Saitsama-o Non-Descript Breed Improvement Farm-ko kuligen ineba ia tom·anio Chief Minister parakataha.