SHILLONG: Shillong Civil Hospital-o gital sanna banani cholrang, chong·motan Biological Waste Management System, 10-bedded Geriatric Ward aro PSA Oxygen Generation Plant-ko Bristibar salo, a·dokni Health Minister James PK Sangma a·bachengate on·angaha.
Ia program-ko Shillong Civil Hospital-o donggipa Health Services-ni Joint Director office-ni gita ong·atangaha aro ia program-ko ong·atanio a·dokni Health Minister, jinmana aganprakangengon, dingtang dingtang ra·biani aro neng·nikanirangko chagrongna nangengoba ia hospital-ko nama bewalo chalaina man·enga ine hospital-o kam ka·enggipa pilak manderangkon mittelpilangaha.
Ia Civil Hospital-o gital sanna banani cholrangko a·bachengataniara a·dokni namroro silrorona a·bachenganiko mesokani ong·enga ineba Sangma aganaha.
Meghalaya a·dokni pilak sanchakram biaprangon apsan dakgipa kamrangko daksningna nangengani giminba ia tom·anio Health Minister aganangaha.
Ia tom·anio Health & Family Welfare department-ni Principal Secretary Sampath Kumar-ba dongpae jinmana aganprakengon, COVID-19 sajinmani somoio sabisiko warachakna rakbee kamrangko ka·ahani gimin Shillong Civil Hospital-ko mittelpilangenba, mikkangchiba apsan daken ka·oksiani gnang manderangna dangdike on·angkuchina gita hospital-o kam ka·giparangko didiangaha.
Shillong Civil Hospital-o Cancer wing-ko da·o chu·gimik chalaina a·bachengaha ine talataniko on·angengon, re·baenggipa bilsirangode ia hospital-ko super speciality hospital ong·atna man·gen ine Kumar, an·tangni ka·dongchakenganiko parakangaha.
Shillong Civil Hospital-o gital sanna banani cholrangko a·bachengata
Date:
Share post:
