TURA: Re·anggipa Bristibar salo, maming MRP tapa grigipa birirangko palenga aro kajinarangko niam gita gamjaenga ine Rongram-o donggipa adita dokkanrangoniko birirangko rim·ani gimik dolbri NGO-rang, chong·motan FKJGP, AYWO, ADE aro FAF dolni dilgiparangko rim·ani ja·man, West Garo Hills a·jani Superintendent of Police (SP) VS Rathore-ni kosako ia NGO-rang, Meghalaya a·dokni Home Minister-na badi ka·doatskaenba, ia SP-ko West Garo Hills a·jaoniko ra·galatchina dabiangaha.
Ia NGO-rang, a·songni niamko jaktango ra·aha ine matnangenba, ia dolbri NGO-ni dilgiparang, chong·motan FKJGP GHZ-ni president Pritam Arengh, AYWO-ni president Sengbath Marak, ADE-ni president Dalseng Bira Ch Momin aro FAF-ni president Brinbal Sangma-ko West Garo Hills a·jani SP VS Rathore-ni ge·etaniko man·e police-rang, Bristibar attamo rim·ahachim.
Ia dolbri NGO-ni dilgiparangko rim·ani ja·man, ia dolbri NGO-ni bang·bea membor-rang, Tura Police Station-ona re·ange, chrik a·bokanirangko dakna a·bachengaha aro ja·mano police-rang, ia NGO-ni dilgiparangko watpilahachim.
Indake ong·engon, ia a·selni bidingo dolbri NGO-ni dilgiparang, an·tangtangni suk ong·gijaniko parakatenba, West Garo Hills a·jani dingtang dingtang biaprango birirangko maming MRP tapa gri aro kajinarangko niam gita gamgijasa palengani gimin uamang, Rongram-o palenggipa birirangko rim·aha aro ia birirangko West Garo Hills a·jani Deputy Commissioner-na pakwate on·ahachim ine talataniko on·angaha.
“Birirangko badinganio kajinarangko gamjaenga aro GST gamchenggijasa birirangko Tura-ona ra·baenga ine matnangenba, February-ni 13 tariko Tura Police, mande sakdokni kosako mokordoma ka·aha aro ia manderangoniko uamangni palenggipa birirang baksana gong lak 6-mangni gita tangka paisarangko rim·aha. Ia obostani bidingo koborko man·soani ja·mano chinga an·tangtangba iani gimin am·sandianirangko dakna a·bachengaha aro am·sandianirangko dakon, birirangko GST gamchenggija ra·baan baksana ia biri packet-rango Maximum Retail Price (MRP)-ko tapaba dongja ine chinga nikna man·aha. Birirango MRP-an dongjagenchimode maikai 28% GST-ko gamna man·skagen?” ine dolbri NGO-rang, Home Minister-na sedoatgipa chittio sing·doataha.
Iandake niam gri birirangko palenga ine koborko man·ani giminsa NGO-rang, Rongram bazar-ona re·ange, tax gamgijagipa aro MRP donggijagipa birirangko rim·e ra·baahachim indiba West Garo Hills a·jani SP, NGO-rangni kosako matnange rim·china gita ge·etaniko on·skaaha ineba dolbri NGO-ni dilgiparang parakataha.
Tura-ni circle inspector an·tangan niam gri biri badingenggipa manderangni kosako mokordoma ka·ani ja·manoba West Garo Hills a·janni SP, niam gri biri badingenggipa manderangna chakna jotton ka·skaenga ineba NGO-rang matnangataha aro ia SP-ko ta·raken West Garo Hills a·jaoniko ra·galatchina gita Home Minister-o dabiangaha.
Indake ong·engon, ia NGO-ni dilgiparang, niamko jaktango ra·e ia dokkanrangoniko bosturangko rim·ahani giminsa police-rang, ia dolbri NGO-ni dilgiparangko rim·aha indiba ja·mano uamangko watpilaha ine West Garo Hills a·jani police-rang, ia a·selni bidingo talataniko on·angskaaha.
Police-rangni u·iatani gitade, Bristibar attamchibara Rongram bazar-o donggipa mitam dokkanrangoniko badiaba dolni manderang, bosturangko ra·sekenga ine koborko man·soahani gimin ia obostani bidingo am·sandie nanga gita ja·kurangko de·china Rongram outpost-ni in-charge-na ge·etaniko on·atahachim. Am·sandianirangko dakon, komibeoba dokkam ge·gittamoniko saksni manderang, biri packet-rangko rim·e seizure list-rangkoba on·aha ine ma·sina man·aha ine police-rang u·iataha.
“Ja·mano ia manderangko sing·sandina gita Tura Police Station-ona rimbaaha aro uamangni on·gipa seizure list-rangkoba police-rang rim·aha. Uamangko ja·mano watpilaha indiba ia a·selni bidingo mokordomako ka·e, ning·tue sandianirangko dakna a·bachengataha. Ia a·selni bidingo kakketko am·sandie niam gita ja·kurangko de·anggen. Birirangko niam gri palenga ine sakkirangko man·genchimode kacharini gita niam gri badinggiparangni kosako ja·kuko de·anggen,” ine West Garo Hills a·jani police official-rang parakataha.
Banoba niam gri kamrangko ka·enga ine nikgenchimode niamko jaktango ra·gija police-rangna ta·raken u·iatchina gitaba police-rang, NGO-rangko aro a·doko songdongenggipa manderangko didiataha.