SHILLONG: Meghalaya a·dokni University of Science & Technology Meghalaya (USTM)-na News 18 media group-ni gita Education Eminence 2022-o ‘Best Private University of North East India’-ni award-ko on·aha.
Ia award ba upattiko, Assam-ni Education Minister Dr Manoj Pegu-ni jakchi USTM-ni Vice Chancellor Prof GD Sharma-na, Robibar attamo, Guwahati songjinmao on·angaha.
Ia award-ko man·ahani gimin ia tom·anio bakko ra·anggipa Dr Manoj Pegu aro dingtang dingtang media group-ni editor-rang, USTM-na kusi ong·chakaniko parakangtokaha.
USTM-oni u·iatani gitade, ia university-o Meghalaya a·dokonisan ong·aigija salgro salaram jol gimikonin aro mongsongbate Guwahati songjinmaoniba chatro chatrirang, re·bae poraitokengachim.
“Ia award-ko man·ahani gimin anga USTM nokdangna angni kusi ong·chakaniko aro namgipa skaniko parakenga. Mikkangchiba ia university, a·gilsak gimikon niksenggipa university ong·angchina angni ska aro bi·a,” ine Assam-ni Education Minister aganaha.
