TURA: West Garo Hills a·jani A·chik Mahindra Pik-up Union baksa nanggrikani ja·man Manggapara songo Chambugong Mahari Association-ni chalaienggipa toll gate-ko chipataha ine kobor on·aha.
A·chik Mahindra Pik-up Union-ni general secretary Sengrak Momin-ni u·iatani gitade, re·anggipa Sonibar salo, union-ni membor saksa Malseng D Sangma, an·tangni Mahindra Pik-up gario, Manggapara crusher-oniko ro·ong sale re·baengmiting somoio, Singimari-Garobadha PWD ramao Chambugong Mahari Association-ni chalaienggipa toll gate-o tangka gilenggipa manderang, uni gariko dongdipate, uniko tangka bi·drae ra·aha aro una receipt-koba see on·aha. Iandake uniko tangka bi·drae ra·ani gimin ia mande, mai niamo pangchake tangkako gile ra·enga ine toll gate-o tangka gile ra·enggipa manderangko order mesokchina bi·on, uamang ia mandeko rakpangpile uko ka·mikkenataha aro ia mande uamangko video ka·e ra·enba ja·mano social media-rango watpripraataha. Social media-rango iandake video-ko watpripraatani gimin ja·mano toll gate-o donggipa manderang, re·anggipa Sombar salo, ia mandeni ro·ong salna re·angmitingko timsoenba, kragija dake doke sate watataha ine Union-ni general secretary parakataha.
Ia a·selni bidingo dokako man·gipa mande, union-ni manderangna u·iaton, ja·mano union-ni manderang, Tura Police Station-o FIR-ko ka·aha aro Tura Police Station-oni Garobadha-ni in-charge-na u·iatskae, toll gate-o ong·gipa a·selni bidingo am·sandienba doke watatgipa manderangko rim·china ge·etaniko on·ataha. Uandaken Garobadha-ni police-rang, Ajgar Ali minggipa mandeni quarry-rangona re·ange ia a·selni bidingo sing·sandieaha aro ja·mano dos dakgipa manderangko Garobadha thana-ona rim·angaha ine union-ni general secretary parakataha.
Dos dakgipa manderangko rim·angani ja·man Manggapara songni Chambugong Mahari Association-ko dilgiparang, dolgni ma·sichakgrike ia obostako namatna gita A·chik Mahindra Pik-up Union-ni dilgiparangko mol·moleon, ia ramao toll gate-ko done garirangoniko tangka gile ra·na man·jawa aro iako dakna ku·rachakaniko on·jagenchimode union-ni gita ia case-ko ra·piljawa ine Union-ni dilgiparang niamko on·skaaha.
Uandaken ja·man Chambugong Mahari Association-ni gita A·chik Mahindra Pik-up Union-na see on·enba, da·ontal ia maharini toll gate-o tangkarangko gile ra·taijawaha ine ku·rachakaniko on·ataha.
“Da·o mikkangchi Garobadha-Singimari ramao toll gate-rangko done, tangkarangko gile ra·taigenchimode chingni union-na u·iatna man·gen,” ine A·chik Mahindra Pik-up Union-ni general secretary Sengrak Momin parakataha.
