SHILLONG: Meghalaya a·doko songdongenggipa manderangna namgipa sanna bananirangko on·na man·kujaengoba aro bilsi 10-na skangan a·doko medical college aro hospital dakjokgipako kulina tik ka·ahaoba da·onan medical college aro hospital-ko kulina man·kujaenga.
Da·o dipet Meghalaya a·doko aro mongsongbate Shillong songjinmao NEIGRIHMS, civil hospital-rang aro private hospital-rango manderangko sanna banna man·engoba chol dongkalgipa manderangde nambata sanna bananirangko ra·na gita gipin biaprangona re·angtokenga indiba chol ong·pagijagipa manderangde a·doktangon sanna bananirangko ra·na nangtokpaengachim.
Private hospital-rangode namkala sanna bananirangko ra·na man·engoba damrang rakdugaani a·selan cholgri ong·pagipa manderangde sorkari hospital-rangon pangchakna gita nangtokaia indiba sorkari hospital-rangode manderangni nangani gita sanna bananirangko ra·na man·tokskajaengachim.
Shillong medical college-ko kulina gita 2012 bilsion chanchiani ong·katahachim aro ua somoioni gitcham sorkari, ia medical college-na pangchakaniko Jhalupara-o songna gitan bilsi 5 somoiko nangskaahachim.
2018 bilsio MDA sorkari re·baskaani ja·man, ia medical college-ko Jhalupara-oniko Umsawli-ona apjitna gita tik ka·skaahachim indiba ia medical college-ko PPP mode-o KPC group baksa nangrime chalaina tik ka·giminko bilsibrini ja·man sorkari, den·galpilahachim.
Ia medical college-ko rikani bidingo official-rango sing·sandiaton, ia project-ni DPR da·o matchotangengaha aro iana sorkari, mitam dolrang baksa agangrikengaha ine official-rang parakataha.
Koborko on·ani gitade, iani bidingo a·dokni Chief Minister, adita salrangna skangsan tom·e chanchirimangaha.
“DPR matchotahaode EOI-ko on·gnok,” ine official-rang aganaha.’
Ia medical college-ko sorkari, PPP mode-o chalaigenma ma chalaijawa uni giminde official-rang aganna gita jechakskaaha.