SHILLONG: Re·anggipa Sombar walo, Nongrah Nonglum-ni Wahktieh jolo, mande saksa, an·tangni bilsibri aro bilsigni ong·gipa bi·sa sakgniko so·ote galaha ine kobor on·aha.
Ia mandeni bimingara Joefreeson Jana ong·achim aro ua an·tangni bi·sa sakgniko so·otani ja·man noktangoni kataha ine kobor on·aha.
Kobor on·timgiparangni u·iatani gitade, ia mande, pangna dakrongbewal gitan Sombar attamoba, an·tangni bi·sa sakgniko ja·achi roramna rimangahachim indiba ia bi·sa sakgnini manggisiko Mongolbar pring 8:15 bajimango, jolni manderangsa nikaha.
Sombar walo, ia mandeni ma·drangrang, ia mandena phone ka·on, uni mobile switch off ong·ani walni 11:30 bajimango, FIR ka·na gita Rynjah police station-ona re·angahachim.
Mongolbar pringo ia bi·sa sakgnini manggisiko man·ani gimin koborko man·soa bakan SP (City) Vivek Syiem-ni dilanichi dolsa police-rang, ia biapona re·ange ia biapko kapenge donataha.
Ia bi·sa sakgni manggisiko man·ani ja·man, pagipako nikkujaengani gimin an·tangni bi·sarangko so·otani ja·man ua an·tangba so·ote siahakon ine police-rang chanchichipenga.
