TURA: West Garo Hills a·jao District Medical & Health Office-ni Surveillance Worker-na District Selection Committee (DSC)-ni gita 2020 bilsini October 6 tarikoni 8 tarikona ong·atanggipa personal interview-ni result-ko da·o ja 20 ong·angpilengahaoba parakchipkujaenga ine candidate-rang parakatenba, kamna senge dongenggipa chadamberangni namgnina ia interview-ni result-ko ta·raken parakchina didiattaiaha.
Interview-ko mikkangpagipa candidate-rangni parakatani gitade, ia Surveillance Worker-ni kamna 2017 bilsini May 17 tarikon advertise ba jinmana u·iatani ja·man written examination ba porikkako 2020 bilsini August 8 tariko ong·ate ia porikkani result-ko apsan bilsini September 29 tarikon parakahachim.
Uandaken porikka seanio pass ka·gipa candidate-rangna apsan bilsini October 6 tarikoni 8 tarikona personal interview-ko ong·atskaahachim indiba da·o 2022 bilsi ata ong·pilengahaoba ia interview-ni result-ko parakchipskakujaenga ine candidate-rang parakataha.
“Chinga interview-ko on·aoni da·o ja 20 ong·angpile sengengaha indiba da·onan result-ko parakchipkujaenga. Ia kamni result-ko parakchipkujaengani a·selan ching gita kamna senge dongpaenggipa chadamberangde neng·nikanirangko chagrongna nangtokengaha,” ine kamna porikka see pass ka·gipa candidate-rang parakataha.
Iani bidingo, West Garo Hills a·jani Deputy Commissioner-na aro District Medical & Health Officer (DM&HO)-naba seachi u·iatahachim indiba maming aganchakaniko man·jaha ineba candidate-rang parakataha.
