SHILLONG: New Shillong Township-ni Mawdiangdiang-o rikenggipa gital Assembly building-ni protchong, re·anggipa May jani 22 tariko be·gruahani gimin ia protchong-ni be·gruani a·selko Indian Institute of Technology (IIT) Guwahati-ni sak 30 membor donggipa dol, am·sandina gita a·bachengataha.
IIT Guwahati-ni membor-rang, re·anggipa Sonibar salo, ia biapko adita nisrokangaha aro am·sandiani kamko matchotna gita jasa somoiko ra·angaha.
Ia gital Assembly building-ni protchong be·gruani ja·man dingtang dingtang dolrang aro a·doko songdongenggipa manderangni jegalanirangko man·ahani gimin a·dok sorkari, ia protchong be·gruani a·selko am·sandina gita dolbri IIT-rangna seatahachim aro iana IIT Guwahati sechakatenba, ia gong kror 127-ni Assembly building maikai be·gruna nangaha, uko am·sandina gita ra·chakangaha.
“Ia nokni naljokaniko IIT Guwahati-ni manderang sandirokanggen aro ia kamna uamang pilak nanga bosturangko ra·e re·baaha,” ine Budbar salo, PWD (Buildings)-ni official parakataha.
IIT Guwahati-ni kamrangko ka·anio PWD engineer-rang dakchake on·gen ineba ua official parakataha.
PWD official-ni parakatani gitade, ia am·sandigipa dolko man·a dipet seng·gnang kamrangko matchotatenba, report-ko on·china a·dokni Chief Minister Conrad K Sangma aro Assembly-ni Speaker Metbah Lyngdoh aganaha.
Indake ong·engon, ia gital Assembly building-ni protchong be·gruani a·selko IIT Guwahati-ni membor-rang am·sandina a·bachengataha ine a·dokni PWD (Buildings) Minister Dasakhiatbha Lamare-ba parakataha.
“Ia kamko IIT Guwahati-ni sak 25 ba sak 30-mangni membor-rang ka·enga aro uamang jasani gisepo report-ko on·gen,” ine Lamare parakataha.
Ia gital Assembly building-ni protchong be·gruani a·selko am·sandiatengani gimin sorkari, ia nok rikani kamrangko dontongatchengahachim.