SHILLONG: Re·baenggipa 2023 bilsini Meghalaya Legislative Assembly election-na tarikrangko parakatahaon, NPP-chi dilenggipa MDA sorkarini ong·gija dakgipa kamrangna ‘charge sheet’-ko file ka·gnok ine Sukrobar salo, Meghalaya Pradesh Congress Committee (MPCC)-ni president Vincent H Pala parakataha.
“Chinga sorkarini dingtang dingtang kamrangko nirokna gita committee-rangko songmanaha aro election-ni tarikko jinmana parakatahaon MDA sorkarini kosako charge sheet-ko file ka·gnok,” ine Pala parakataha.
Assembly election-na da·o somoirang bang·e dongjaha ine janapatengon, ia election-na Congress dolni gita uamang tarisamsoengaha aro Sukrobar salo Congress dolni tom·anioba uamang election-na tarisamsoani bidingo chanchirimangaha ine MPCC-ni president parakataha.
Sorkarini kosako charge sheet ka·anio mai dakgipa kamrangko mesokgen ine sing·on, “A·doko niam retirangko nirok sandianio, a·doko joa kal·aniko niamo ong·atna manchianiko manderang jegaltokenganiko aro uandakgipa kamrangko mesokgen,” ine Pala parakataha.
A·dok sorkari tangka paisarangko jakkalsretenga ine matnangatengon, Shillong-oni Nongstoin-ona songreanggenchimoba a·dok sorkari aro Autonomous District Council (ADC)-rangni chalaienggipa toll gate-rangko bang·en nikna man·a aro ia toll gate-rangan manderangoniko ra·seke ra·enga ine MPCC-ni president parakataha.
Meghalaya a·doko economy-ko sorkari name rakkina man·jaengani a·selan skigiparang, district council-o kam ka·giparang, health department-o kam ka·giparang aro dingtang dingtang department-rango kam ka·giparang dormaharangko man·jaenga ine Pala parakataha.
