WILLIAMNAGAR: Ma·mong sorkarini ra·gatgipa Jal Jeevan Mission (JJM)-ni bidingo RTI ka·anina East Garo Hills a·jao Public Health Engineering (PHE)-ni PIO, RTI Act 2005-ni Art 11-ko pa·sike, aganchakaniko on·na jechakaha ine kobor on·aha.
Koborko on·ani gitade, JJM-ni ning·o contractor-rangni bimingrangko aro project ge·antina contractor-rangna badita tangkarangko on·ahachim, uarangni bidingo talataniko on·china RTI ka·ahachim.
Indake ong·genchimoba, RTI Act-ni Art 11-o pangchake contractor-rangkosa 3rd party chanskaenba, JJM-ni gimin RTI ka·anina East Garo Hills a·jao PHE-ni PIO, aganchakaniko on·na jechakaha ine kobor on·timgiparang parakataha.
Kobor on·timgiparangni u·iatani gitade, RTI-ni niamo pangchake PHE department-sa 1st party ong·e, contractor-rangde 2nd party-sa ga·akachim aro JJM-ni kamrangko ma·sina sike am·sandigipa dolsa 3rd party ga·akachim.
“Contractor-rangni biming aro uamangna gamgipa tangka paisarangni gimin maina parakjaha ine chinga PIO-o sing·on, ua RTI-ni Art 11-ko pa·sike, department-de 1st party ong·e, RTI ka·e am·sansigiparangsa 2nd party aro contractor-rangsa 3rd party-o ga·aka ine chingna aganaha. Uni iandake aganchakaniara namen aiao inmanani ong·aha,” ine RTI-ko ka·gipa manderangoni saksa Najip G Momin parakataha.
East Garo Hills a·jao JJM-ni bang·bata kamrangan niam gita ong·jahani giminsa ua RTI-ni niamko pa·sike talataniko on·na jechakahakon ineba Momin parakataha.
Indake ong·engon, iani bidingo Meghalaya a·dokni Chief Information Commissioner (CIC)-ona ra·doangna gitaba RTI ka·gipa manderang tik ka·angaha.
