Tura: Achik Holistic Awakening Movement (AHAM), Rongkhon Basic School sepango donggipa bilgrigipa dolongko nirokatjaengani gimin sing·doataha, ua dolong gita salantion hajalni hajal manderang jakkalenga, uni gimin ta·raken ua dolongko nirokatchina dabiaha.
“Ia dolongkon dingtang dingtang educational institution-o poraigipa bi·sarang salantian re·rurana jakkalenga. Una agreba teacher, sorkario kam ka·giparang aro bang·a manderangan ia dolong gitan re·ruraenga, ine president Georgeprince Ch Momin aganaha.
Dolongni obosta namjaengjok bilongen bilgriaha, basakobade niksrapgijan a·sel ong·na kenani donga. Adita badi ka·anirangko man·soe chinga ua dolongni obostako nirokna gita re·angaha aro beben chinga an·tangan dolongni obostako nikeaha aro suk ong·jaha. Ia bolchi rikgipa dolongko bilakgipa cement-chi rikskachina chinga dabia, jedakode mikkangchi a·sel ong·gniko champengna gita man·gen ineba Momin aganangkuaha.
Iarangna agreba je biapon ia dolong donga, ua jolni ramarangba bilongen namja. Ramao chi sketa aro kongbang kongbang dakani a·sel ua ramako re·ruragiparangna bilongen neng·nikani ong·enga, uni gimin jolni ramakoba AHAM, nirokatchina dabiangaha.
